DOWNLOAD OUR APP

Read latest news on your phone
play-store app-store
app-store
A lailumah upate - Lalbiakmawia Khiangte,L-9, Laipuitlang, Aizawl
titi ZALEN
Apr 27, 2019

ad


  • Pathian thu chuan naupang leh upate hi a dah hlu hle a ni. Naupangte chu van lam ro kan khawm, Lalpa laka kan rochan ni hialin a sawi a. Upat leh damrei hi Pathian malsawmna a nih avangin dinhmun zahawmah dahin a chawimawi hle bawk a ni. Ram changkang apiangin naupangte leh upate dinhmun an dah pawimawh hle a, anmahni enkawlna kawngah hma an la nasa a, an ngaihsak em em bawk.
    Tun hma Mizo khawtlang nunah naupangte’n ngaih pawimawh an hlawh lo viau a. Puitling zinga an lo awm vete chu hnawksak an ni ringawt a, “Chhuak rawh u, pawnah awm rawh u,” tih an ni thin. Enkawl fai an nih loh avangin, “Naupang tete uite rim nam,” an ti mai mai thin bawk. Amaherawhchu, tunah chuan naupangte chuan ngaihsak an hlawh ta hle a ni. Nu pum chhunga an awmlai atangin enkawlna tha pek an ni a. An senlai atangin hri danna chi hrang hrangte pein chaw tha ngaihtuahsak an ni nghal a. Duhthusam chu la hlat deuh mah ila khawtlangah leh inchhungah a lailum an chang tawh a ni. An duhzawng zawng kan tihtir a, kan khalhtir a, an duh ang chu kan hnial lo a ni ta ber mai anih hi. Hetih lai hian upa leh tarte erawh chu, “Ve ringawt a che,” kan la ti deuh va, a kil lamah kan hnawl chu a la ni ber mai lawm ni?
    Mizoin upa emaw tar emaw kan tih ringawt ai hi chuan saptawnga ‘senior citizen’ han tih hian zahawmna a ken nghal avangin upate hnenah hian zahawmna a pe nghal a ni. India ramah chuan kum 60 chin chung lam hi ‘senior citizen’ an ti a. Chutiang mi hnenah chuan central sawrkarin pension thla tin Rs. 200 a pe a, Mizoram sawrkarin Rs. 50 lekin a lo khing ve a, Rs. 250 a lo ni ta a nih chu. Sanction a tlem avangin pension hmu thei ngei tur hmu si lo an tam em em a ni. Chu mai a ni lo va, Mizoram sawrkarin a lo khinna hi a beitham kan ti theuh awm e. Tripura sawrkar chuan Rs. 500 lai a lo khing a, Rs. 700 a pe a ni.
    Keinin upa kan tih hi Israel-ah chuan ‘Golden age’ an lo la ti leh zel a. An ram a changkang a, mihring dam chen pawh a rei a. Chuvang chuan mipa kum 67 leh hmeichhia kum 62 chinte chu ‘golden age’ an tih chu a ni. An inpawlkhawmna leh intihlimna tur ‘Club’ te an siamsak a. Pension an pe tha em em a. Hetiang pension hmutu hi chuan thil dang ngaihtuah ngai lova kham khawp a hmuh bakah han zin khawthanna turte pawh a khawl thei a ni. India ramah pawh hian sawrkarin that a chhuah ve zel a. Kum 60 tling chin tan chuan thlawhna chuan man te, rail chuan man te, bus chuan mante pawh a chanve zelin a tih theih a. Hetiang a nih mek lai hian vantlangah leh chhungkaw tinah insiamthatna tur a tam hlein alang.
    Ka tel vena MUP Committee-ah chuan thawhlawm khawn chungchang kan sawiho laiin member pakhatin, “Engmah kan thawkchhuak ve tawh si lo va,” a han tih chuan ngaihtuahna a tithui hle. Hnuk a ulh tep a, thin a tirim deuh bawk. Hetiang hi a lo ni dawn hlawm maw! Ka nu leh pate ka laka an inthlahrung hauh lo kha a lawmawmzia min tihrechhuak uai uai a. Kei chuan, “Engah nge in inthlahrun ang? In fate hi an sen tet atanga a thim a var thlu lova, a hahthlak turzia leh hrehawm turziate pawh ngaihtuah chang lova an tana in thawh nasatzia te kha. In ei ai ai in eitir a, in silh leh fen ai ai in silhin in fentir a. An puitlin thlengin an tan in inhmang ral rak a. Engah nge in inthlahrun? Anmahni leh an thawhchhuah ve tak zawng zawngte hi in thawhchhuah vek anih hi hre ta che u,” ka’n ti ta phiar phiar lo thei lo a nih chu.
    Kan nu leh pate hi kan hriat loh hian an lo inthlahrung thei viau dawn a ni tih ngaihtuah thar a tul hle mai. Tunah hian ka ‘turn’, ‘ka tih ve hun’ a lo thleng ta a nih hi ti a, theih ang tawka kan duat leh enkawl a lo hun ve ta a nih hi. Hetianga enkawl tur kan nei hi a vanneihthlak hle mai tia an thu leh hla ngaithlain a lailumah i dah teh ang u. Thil sawi thiam leh fing tak an nih loh pawhin kan hriat reng tur pakhat chu, ‘ngaithlatu’ an mamawh a ni, tih hi. Ngaithla ila, ngaihsak ila, ngai pawimawh ila, duhsak ila, kan hmangaih a ni tih an hriat theihna tur kawng hrang hranga lantir i tum thar teh ang u.

Latest News & Chhiar Hlawh