ZALEN, March 4, 2025: Youth Icon 2024 Top 5 Samson Lalhunruata chuan a official music video hmasa ber chu a nupui neih zanah a tichhuak dawn.

Samson-a hian Thawhlehni tuk khan nupui a nei a, a nupui neih chu a music video thar, ‘Ka rawn hruai ang che’ tih hmangin a lawm dawn a, zan dar 8-ah a YouTube channel-ah a tichhuak ang.

Video hi tun laia music video siamtu hriat hlawh leh hmanhlawh ber pawl, OSiama Pictures kutchhuak a ni.

‘Thahniangi’ tih hla avanga intihsiak lai atanga mite duh rawn, Samson-a hla thar tur, ‘Ka rawn hruai ang che’ hi Youth Icon intihsiak laia a sak ang chi niin thluk nem lam, a sak thiam chi tak a ni.

Tar lan tawh angin Samson-a hi Bawngkawn, Aizawl nula, Grace Malsawmtluangi nen Kanan Presbyterian Kohhran Hall, Champhaiah an inkutsuih a, inneih inkhawmah hian Youth Icon-a a thiante eng emaw zatin an tawiawm nghe nghe.

Champhai tlangval ni thin, pa ni ta Samson-a hi intihsiakah khan a thleng sang ber pawl ni lo mah se a aw sin sang fawn nalh takin mi a hip a, tantu pawh a ngahin a tlak hnuah pawh duhsakna thilpek dawng nasa leh tun thlenga zai tura sawmna dawng tam ber pawl a ni.