March 5, 2024; Pathianni zinga an chenna ina thi-a an hmuh Manlianchingi (37), Mimbung khua thihna chungchangah a pasal Chinpauva chuan kut a thlak ngei tih Police hmaah a inpuang.

Maipawl Website in a tarlan danin, Manlianchingi hi Pathianni zing khan a pasal chuan a muhlum niin a sawi a. Vui tura an inbuatsaih laiin Lamka-a a chhungte chuan a ruang hi lo la dah a, an rawn thlen hma chuan lo vui rih lo turin an ngen avangin Manlianchingi ruang hi darkar 24 chuang zet vui lohvin a awm a ni.

Manlianchingi hi a thih hun tak hriat a ni lo a, Inrinni khan a pasal Chinpauva chu a ramriak a haw a, in hauh buaina an nei ni-a hriat a ni a, a pasal haw tuk Pathianni zing khan a pasal hian a mu hlum ni-a a sawi hnuah Mimbung khawtlang hian a thi tih an hre chauh a ni. Tun hma lamah an nupa hi inhauh buai nei fo an nih avangin Pi Manlianchingi thih dana sawiah hian a chhungte an hmin zo lo a, a ruang hi Ngopa CHC-ah endik a nih hnuah nizan dar 8:30 khan vui liam a ni.

He thihna chungchangah hian Manlianchingi chhungte chuan Ngopa Police station-ah thubuai an ziak lut a, Ngopa Police-te chuan nimin tlai hian a pasal Chinpauva hi manin thu an zawt fiah a, Police hmaa a inpuan danin Inrinni zan hian a nupui hi kut a thlak ngei a, kut a thlak hnu hian tha taka an mut mai thu sawiin zingah a kai tho zo ta lo niin a sawi.

Ngopa Police-te chuan tual thah thubuai ziak lutin tualthattua puh hi Lung ina khung turin vawiin khan Aizawl panpui nghal a ni a; chhui zui ngai tul dangte an chhui zui leh dawn a ni.