A pasal hlui Johnny Depp nen an inkhinnaah thiam loh changin, $10 million chawi tura court-in a tih hnuah zet chuan, hmeltha lalnu Amber Heard pawh a khawsak a pan ve ta deuh a nia nge, discount dawr-ah a bazar ve ta lawp lawp mai!

Aquaman star Heard-i an hmuhna dawr hi TJ Maxx, Hamptons hmuna awm a ni a, hmeichhe chapo ve tak Heard-i bazar lai thlalak hi TMZ show lamah tlangzarh a ni. Heard-i kiangah hian a laizawn Whitney Henriquez pawh tel vein an inchei casual dun hle nghe nghe. Heard-i hian kamis var thawl lam a ha a, jeans khup tet a ha bawk. A bazar-na hmun hi hmeichhe thawmhnaw a tlawm a zawrhna dawr lar ve tak a ni nghe nghe. 

An inthen vangin a pasal hlui Depp chuan sum thahnem tak a pe a, Heard-i hian court lamah a puh hmingche hle bawk. A nupui lakah hian Johnny Depp chu a lungawi thei thlawt lo. Tichuan, intihhmingchhiatna (defamation) case file-in a khing let ve leh a, hun rei tak chhung finfiahna thahnem tak nen court lama an inkhin ta. Pasal kut tuar thin anga hriat, hmanni lawka khawvel-in a khawngaih rawn Amber Heard nihna hailan a ni chho a, mahni pasal kutthlaktu a nih leh uire nu a nih thu hai lan a ni zawk ta hlauh mai le. Court-ah chuan thiam loh changin, a pasal hlui hnenah $10.35 million pe let tura tih a ni ta bawk. 

The New York Post sawi dan chuan, tunhnaiah kum 36 mi Heard-i chu sum lamah tlachhia-in harsatna a tawk chho mek a, a sum bawm lam pawh a ruak tawh hle a, Depp-a hnena a pawisa chawi tur $10 million phei chu a tan pek ngaihna a awm lo niin an tarlang.