ZALEN September 30, 2026 : Thawhtanni zan dar 9:53 khan Ramthar North, Aizawl a cheng Lalthangliani kum 46 chu an chenna inah thi a hmuh a ni.

Thudawn danin, Ramthar North khawtlang hruaituten Lalthangliani te ina an kal hian Lalthangliani chu khumah a hmai chauh langa mu a hmuh a ni a. Inchhungah thisen hmuh a nih avangin Police te hriattir nghal an ni. Police leh forensic team te chuan a chenna in an endik nghal a, khawtlang hruaitute sawi danin a taksa ah duk leh hliam a awm nual niin an sawi.

He thihna thleng chungchangah hian a pasal Lalrinzuala chu police ten thu zawhfiah turin an la nghal a, tunah hian Police kutah a awm mek a ni. Thenawm khawveng ten thawm an hriat thu an sawi a, mahse nupa karah thawm an neih fo thin avangin ngaiah an lo nei deuh tawh niin thudawnna chuan a tarlang.

A ruang hi Thuampui venga a nu leh pa te chenna lamah lak a ni a, nimin chhun dar 12:00 khan vuiliam a ni. An nupa hian fa an la nei lo tih hriat a ni.

Hemi chungchangah hian Thuampui Branch MHIP chuan thuchhuah siamin pawi an tih thu an tarlang a. An thuchhuah chuan, an hmeichhiatpui an veng mi Lalthangliani chu a pasal kut tuara a nunna chan ta mai chu tawrh har an tih thu leh an ngaihthiam loh thu an sawi a.

Hetianga hmeichhiaten mipa te laka nunna an chan fo mai chu veiawm an tih thu an tarlang a, a pasal hian a phu tawk hremna hmu ngei rawh se tiin an phut a ni.