March 11, 2024; General Administrationi department (GAD) changtu Lalduhoma'n Mizoram sawrkar hnathawk zingah entitlement aia tam staff leh lirthei kawl a ruk a endiktu tur an ruat tih a sawi.

Vawiin assembly budget session zawhna leh chhanna hun ah Tuirial bialtu K. Laldawngliana zawhna chhangin, chief minister ni bawk Lalduhoma chuan, Mizoram sawrkar hnuaiah entitlement aia tam staff kawl an awm hriat a ni lo tih sawiin, an awm a nih chuan February 2024 chhung a lo in chingfel tura hriattir an nih thu leh chumi hnulama an la kawl a nih chuan action lak a nih tur thu a sawi.

Zawhbelh na chhangin Lalduhoma chuan sawrkar hnathawk ten lirthei an dawn theih chin leh an dawn theih tur zat ruahman a awm tih sawi bawkin, "An dawn theih chin bak lo kawl an awm emaw, dawng thei loin an lo kawl emaw a nih a chuan February 2024 thla a ral tawh a, a rukin a endiktu kan siam a, chutiang mi an hria a a, rawn report a nih chuan an phu angin action kan la dawn a ni," a ti.