Mizo tawngin kan dah lo mai ang, kan hre thiam vek!

Pathianni zingah American tleirawl, Coco Gauff-i chuan US Open hmeichhe maltan final-ah Aryna Sabalenka-i chu set khatna hloh hmasa chungin 2-6 6-3 6-2-a hnehin Grand Slam nomawi a la ve ta a, hemi hnua media leh vantlang tawngkam lar tak chu tuna a thupuia kan hman hi a ni.

New York City-a Arthur Ashe Stadium-a mipui 24,000 thu khat tlat bakah a hmuna awm ve lo tam takin he tleirawl hnehna chan hi an lawm a, a lawmpuitute pawh an hrawl hle.

US president hlui, Barack Obama chuan a social media-ah, “Court chhung leh pawnah kan chhuang lo thei lo che - i vanglai a la thleng lo zawk tih kan hria e,” a ti.

A American-pui, 2017 US Open champion Sloane Stephens pawhin Gauff-i chu ‘amazing’ tia a fak laiin mi fak ve theia mawi lo, boxing mihrang, Mike Tyson meuh pawhin, “Coco! I hlen ta! America leh khawvelin kan lawm mek e!” a ti chhuak ve hial mai!

Ni e, kum 19 mi chauh, Gauff-i chungchang sawi nan hian ‘a star is born’ tih tawngkam hi a inhmeh tak zet!

Kum 2019 daih tawhah khan kum 15 mi chauh niin Wimbledon-ah fourth round a thleng nawlh a, mi hmelhriat a hlawh a, hetah hian star thar a piang nia ngaihna a awm hman a, Grand Slam champion a nih zui ngei ringtu pawh an awm nghal a; mahse, a thleng nghal mai lo, a hnu lamah a ropui zui lutuk lo.

July thla khan Wimbledon-ah bawk hian first round-ah a tla leh a, a hming hi ropui zui ta lo mai tur emaw tih turin inelna lianah a langsar thei tlat lo.

Mahse, July thla hnuah hian Washington leh Cincinnati-ah a champion zui a. Wimbledon-a a chak loh hnuah hian khelh 19-ah vawi 18 chak tawhin Sabalenka-i a hneh nen hian a zawna vawi 12 chakin a kaltluan ber tum a tawng mek.

Amah ringngam tawk lotu tam tak an awm tih pawh a hre ve a, nomawi a lak chiah hian, “Min ring lotute chungah khan ‘ka lawm e,’” a ti chhuak nghe nghe.

“Thla liam taah khan Washington-ah WTA 500-ah ka champion a, mite chuan hei hi ka tawpna turah an ngai a. Chawlhkar hnih hnuah Cincinnati-ah WTA 1000-ah ka champion leh a, hei pawh hi ka nomawi lak len ber tura ngai an tam,” a ti.

“Chawlhkar thum a liam leh erawh chuan, hei, he nomawi hi ka kutah a awm ta,” tiin US Open nomawi a chawikang chungin a sawi.

Kum li liam taa ‘star thar a piang’ tia sawi kha pawm lo tam tak awm mah se tunah erawh khawvelin ‘a star is born’ tih chu an pawm tlang lo thei ta lo.