ZALEN September 12, 2026: Mizoram Merchant Association(MIMA), General Hqrs chuan an Office ah, Income tax department atanga lehkha hmu leh buaina tawkte kokhawmin, ruahmanna an siampui a, he hunah hian Vanhela Pachuau, IAS (Rtd.) leh mi thahnem tak an kal khawm a, thingtlang lam atang pawhin an lo tel a ni.

MIMA chuan Income Tax hotu lian, North East region-a an hotupa ber, Principal Chief Commissioner of income tax, Guwahati leh Chief Commissioner leh hotute vawi 2 lai an lo sawipui tawh bakah, lehkha te an pein an lo thawn tawhin, Mizoram a Income tax Office-ah te lengin an sawipui bawk. Income tax atanga lehkha hmute Silchar a thawn ngai lova, lo chinfel saktu tur Qualified Officer pakhat pe turin an dil bawk a. Tunah hian Income hotute atanga hma an laksakna thute lehkha a dawn a ni bawk a.

Kalkhawmte chu lehkha an hmuh te documents ngaite nen chhang zel turin an hrilh a. Hemi chhandan tur hi heltilama mi thiam Lalrammuana, Dawrpui, Joint Secretary, MIMA-in Computer-ah video nen a zirtir nghal bawk a ni. Hetianga an chhan hnu pawha Assessment year inang renga lehkha an la hmu zel anih chuan, MIMA ah report nise tihte an sawipui bawk.

Mizote tribal ni reng chunga Income tax department in lehkha an pek chungchangah Sawrkar nen tanghoa, MIMA, All NGO, All Political Party- te inhmukhawm a, lehkhate siama hmalak dan ngaihtuah nise tihte pass a ni a. Tun ang renga a kal chuan Income tax department hian min tibuai reng dawn a, Pawisa sen lohna turah tam tak tak CA rawih nan an seng reng dawn a, hemi avang hian sawihona hun ruahman huna lo inhawng tur hian Sawrkar, All NGO leh All Political Party te lo inhawng hle turin MIMA chuan a ngen a ni.