ZALEN January 28, 2025 : MNF Vice President, Leader of Opposition Lalchhandama Ralte chuan VC inthlan lo awm tûrah MNF chuan hnehna sâng tak chan tumin hma an lâk mêk thu sawiin, state-a rorêlna changtu ZPM chu a thlang tlingtu mipuiin an nin tan mêk thu a sawi a, sawrkar chuan a theihna apiangah mipui a sawrfu mek a ti.

Tuivawl bial fanga hun hmang mêk hian nMauchar, Palsang leh Zohmun, Zokhawthiang, N. Tinghmun, Upper Sakawrdai leh Sakawrdai te a tlawh. He hunah hian Lalchhandama Ralte chuan, "Sawrkarin kawng siamna tûr tiin road tax a ti sâng a, oil man an tisâng bawk a, an cess lâk chu kawng siam nan kan hmang dâwn ti reng chung siin kan supply line kawng a la chhe êm êm reng a ni. Chu mai ni lovin, buhfai man a lêt thawkin an han tisâng a, kan hnianghnar phah lêm lo."

"MNF sawrkar lai, buhfai man ₹ 15/- a nih lai khân buhfai kudam te a khat tlângpui a, vawiinah chuan ration la tûr khaw hrangten an nghâk rei thin hle a, tun dinhmunah khuarel chhiatna rawn thleng palh thut ta se, tâm hmachhawn thei reng dinhmunah kan ding mêk a ni. MNF sawrkar hun lai khan ration buhfaiah kan hnianghnar hle a, dah hmasate a chhe hman ang tih hlauhawm khawp a ni thin." a ti.

"He sawrkar kan hrawn mêk hian leiman, chhiah hrang hrang an tipung a, harsatna hrang hrang kan tâwk mêk a, a theihna apiangah mipui min sawrfu mêk a ni," a ti bawk.

MNF Vice President chuan, "MNF sawrkar khân kan ram hmasâwnna kawng tam takah a thlen a, ZPM chuan zirtirtu indaih lohna pawh dah belh aiin, a awmchhunte pawh min sawn chhuah sak chur chur zâwk a ni," a ti bawk.