Aizawl : Vawiin khan Home Minister Lalchamliana chuan a pisa-ah media lama thawktute a kawm a, ramri buaina chu politics-a hamthatna lak tumna chi a nih loh thu leh lungrual taka hmalak hona chi a nih zawk thu a sawi a, political party bakah MKHC leh NGO te nen July 14, 2021 hian hemi chungchangah meeting neih a nih tur thu leh a tul anih chuan inkah pawh an huam thu a sawi.

Home minister chuan ramri buai chungchangah thal thlah hmasatu nih tha a ti lo tih a sawi rualin a tul anga zela hma la turin sawrkar chu a inpeih a ti a, press mite zawhna a chhangin Lalchamliana chuan, "A tul anih chuan kan inkap ang. Inkah loh hram hi chu chu kan duh dan a ni," a ti. Ramri-ah police thahnem tak dah an ni a, a awmsa te pui turin a theih anga tam thawnbelh an nih thu leh, mi dang pawh inralring reng tura tih an nih thu a sawi bawk.

Ramri buai chungchang chu mimal emaw, pawl emaw tana hmingthatna lak tum leh inchirhtheh nana hman chi nilovin tanrualna tur a nih zawk avangin Chief Minister hovin political party, NGO leh MKHC te nen joint meeting July 14, 2021 ah hian neih a nih tur thu a sawi a. He meeting a thutlukna chu an kal zel dan tur hriltu tur niin lungrualna tha tak an neih ngei a beisei tih a sawi.

Media zawhna chhangin ramri chungchangah Cachar Inner Line 1875 chu cabinet meeting mai ni lo, house pawhin a pawm a, tunah hian a thu chuan hmalak reng a nih thu sawiin buaina a awm apiangin home secretary lamin central sorkar leh Assam sorkar-ah ziakin an thlen thin niin media te a hrilh a ni.

Tun hnaia Assam lamin ramri a buaina a rawn siam leh chu tha a tih loh thu leh a dem takzet thu Home Minister chuan a sawi a. Chalchhunga, Buarchep khua huana thlai an tihchhiatsak chu vanduaithlak a tih thu leh inzahlohnaah a ngaih thute media te a hrilh bawk a.  Assam sawrkar chu compensation pe ngei tura an phut thu leh a tul angin sawrkar pawhin hma a lak tur thu a sawi chhuak bawk.