Dikteii Hnamte -

Bial Zaipawla ka tel ve lai khan vawi khat chu inkhawmpui (lian ve thawkhat)ah hla kan rem a. Kan hla rem tur kha kan zir nasa bawk a, thiam kan inti ve khawp mai. Khang hunlai khan music nena zai kan la ching lem lo va, conductor solfa vai chu kan zai hruaitu ber a ni mai. Kan ‘confi’ bawk a, kan zir laia kan ruahman angin a bultan laiah chiah kan hruaitu chuan min vai zai a, a bass ho bulah a rawn phei a, a zai ve nghal mai a. Mahse le, khawilaiah khan nge a kalsual a, a tir atang khan kan la fuh lo nge pawh a hriat tawh loh, vuak chanve zel khan a bai ta auh auh mai a nih chu. Rual fahranin, mahni sak tur part theuh hneh em emin vuak chanve-a baiin kan sa tluan thak a. Mi dang hriatpui lem lohvin luthak lo pui kan hiat a, thlanfimin min bual ru reuh reuh a, inkhawm bâna kan inhmukhawm chu nuihza lo deuhvin kan nui vak vak a ni ta ber awm asin! Kan zai ngaithlatute khan kan tihsual kha hre ve si-se lo mah se keimahni khan kan hre tlat a, tun thleng hian ngaihtuah chhuah apiangin a la hrehawm thei zu nia…

Covid-19 thawm kan hriat tirh atanga tun thlenga kan hun tawng leh kan hmachhawn dan hi a chik peih deuhvin an hriat chian tluk deuhthaw tho hian chik peih lem lo pawhin kan hre lo thei lo chu a ni a. Mipakhatin a kai tih hriat atanga bul tanin hlauh namen lovin kan hlau va. A kaitu leh amah thurawn petu nia kan ngaih daktawr demin bul kan tan a. Amah hre ngai miah lo leh an in awmna pawh hre lo kha inah kan tawm nghal a, a veng demin kan dem a, hming chi tin reng kan vuah a nih kha. Chutah eng emaw chen kan fihlim hnuah mahni pianna ram bel tura lo hawngte atanga hri kai lo awm ta zeuh zeuhvin chu’ng ho chu kan selin, ar-chuk-tuilo khawpin kan chhuah a, an lo hawnna motor-in kan khua a tlan pelh laia tukverh hawn hial kan inkhap zui bawk a. Kan invenna hriat chhun – inkharkhip chu amilian-amite, apui-apang leh anei-anghei thliar lovin kan inbarh a. A nawlpuiin hripui hnathawh leh inkai darh hlauhna avanga thupek zawmin kan tawm rei hle. Chu kan inkharkhip chuan rah tha a chhuah chho viauva a lan hnu reilo teah chutiang ngawta hripui chu umbo a lo theih lohzia hre chhovin kan phunchiar chho ta a, kan thuawihnate pawh chuan a fan tawp a thleng chho titih ta chu a ni ber mai.  

Covid-19 vanga nunna chân hmasa ber kan kalpui dante kha kan la hre theuh awm e. Hun lo kal zelin, hripui vanga nunna chân kan sawngbawl danah pawh hriat dan a inan loh avangin fimkhur (loh) dan pawh a inang lo zung tawh a, a tha ber leh tha lo ber pawh hriatthiam har khawpin thu thar leh thil thar hriat a ni chho zel bawk si. Tun dinhmunah chuan V/LLTF rorel thiam leh thiam lohvah kan chim chin a inang lo ta zung mai a. Veng thenkhat, fihlim rei deuhvin an tihdan a fuh ber nia an uanpui lek lek hnu lawkah an fihlim lo chho leh a, a nui hmasa an nguai hnuhnung ni maia a lan chang a tam ta mai. 

Thuneitu lam tana thutlukna siam thiam har khawpin a ka-kaw-nazawngin ngaihdan buluk leh awihawm ve thei zet zet an thehdarh chak em em a. Mahni duh dan anga thil a kal loh avanga demna nasa tak karah sawrkar leh kohhran leh tlawmngai pawlte chuan an hma zawna tihtur an tih thulh chuang lo hi an fakawm letling zawk phian mai. ‘Mass testing’ chu kan hri dona kawnga hmalakna chak ber tur nia ngaiin kil hrang hrang atangin na taka sawrkar nawr  a ni a. Chu chuan hri kai hmuhchhuah tihtlem ahnehin a pung hluai emaw tih mai tur a ni lawi si. Tunah lah he kan ‘mass testing’ tihna hmanrua, RAgT chu dik tawk lovin, negative lena thawveng taka leng tam takte hi lo positive renga hri kai darhtu an nih theihzia chu thu awihawm tak a lo ni leh ta anih hi! 

Mi thiamten he hripui kalphung leh chet dan hi an zir a, hri kai tihhniam te, thihpuitu tihtlem te, chenpui dan zirchhuahte a theih dan kawng kawngin mahni zawn theuhvah hma an la nasa hle. Mipui lam tih tur te, sawrkar tih tur te leh tlawmngai pawl leh khawtlang tih tur, mi mal leh chhungkaw fimkhur dan tur thlengin kan inzirtirin kan inzir chho zel a, kum khat chuang fe zir chho ta chu thiam intih chin pawh kan nei theuh niin a lang. Chutih lai chuan tun thla hnih/khat chhunga kan inkai darh chhoh dan leh thihpui kan tam danah hian mi tin hian kan tih tur bel riauva kan inhriat lai hian ‘vuak chanve vela sak bai’ kan nei niin a va lang ta si em! Mask vuahin eng emaw chen min veng thei tih hre chunga khabe-a vuah tlat te, taksa inhnaih chilh loh hian hri kai kan tawn palh pawhin a hlauhawm dan a nep tih hre chunga vaccine la tur, gas chang leh ration laten titi ho laih laih kan la ching tho te, inlenpawh loh a him tih hre chunga mahni chhungkhat leh thenawmte lenpawh sim theih tlat lohte hi uluk taka zaipawlin hla rem tura kan zir hnua vuak chanve-a a bai ta tlat, a ni lo lai chat zela lak fuh chat chat nen khan a inang riau lo maw?

Kum 30 zet liamtaa kan Bial Zaipawl hla rem tur khan kan ‘confi’ lutuk avanga kan conductor ber pawh min kaihruai reng lova kan zinga lo zai ve tura thutlukna kan siam a fuh lo ta ang khan, tun huna kan hripui dona kawngah hian kan hruaitu (sawrkar) hi a tir lamah chauh hruaitu nia a hnu lama mipui duh dan ringawta a kal loh nan a mipui lam hian hruaitu a nihna hi dah pawimawh thiam ila. Mi mal, chhungkua, khawtlang, tlawmngai pawl, kohhran leh sawrkarte hian ki (key) thuhmun hmanga a vuak dik taka kan hla sak tur hi la chat chat thei turin kan pual theuh hi hneh lehzualin zir leh theuh ang u. 

Sawisel satliahtu ni lovin, kawhhmuh tur tha kan hria a nih loh phei chuan thuawihna hmangin mahni inthunun zir nawn leh ila. Covid-19 dona atan leh chenhopui zirna hla pangngai - hmaikawr vuah, taksa inhlat leh kutsil ngun/sanitizer hmang tura thuawihna kha VUAK dang hmanga sak turin an la phuah thar chuang rih lo a ni si a. VUAK dikah tak zel kan lak chat chat a, kan tihsual nawn tawh loh nan leh mualphona leh zahna kan pumpelh theih nan mi dang sak tur lam buaipui tel lovin mahni sak tur theuh ennawnin inzir thar leh ang u.