Aizawl April 3, 2024 : AAP Mizoram chuan Lok Sabha inthlan lo awm turah candidate an nei dawn lo va, mahse central-a INDIA Alliance hnuaiah Congress-te nen thawhhona an neih mek avang leh, Delhi lama an hruaituten BJP paihthlak a, democracy tun din a nih beiseiin INC candidate Lalbiakzama chu an thawhpui dawn tih an sawi. ZPM chuan an hawilam tichiang turin an ngen bawk.

AAP chuan BJP sawrkarna hnuaiah Eptu Party-te rahbehin an awm nasa hle a, dan te siam tharin an pu ber Arvind Kejriwal-a pawh Prevention of Money Laundering Act hnuaiah jail-ah an khung sak mek a. Ani bakah hian an minister pahnih jail-ah an khung mek a, mi dang pawh an vau reng bawk a ni, tiin, An hotute chunga ah chet dan chuan AAP an hlau hle tih a lang, an ti.

AAP Mizoram President Andrew Lalremkima chuan ZPM chu an hawi lam tichiang turin an ngen tih an sawi a, NDA leh INDIA Alliance angin India ram a inthen phawk a, an kalna lam tur tichiang law law se an ti a, Bak ang maia khawsa lo turin an duh tih a sawi.

AAP President chuan, BJP chuan Sum leh thuneihna hmangin thiam takin lamtang an siam mek a, North East India-ah Mizoramah chiah lalna an chan theih loh avangin theihtawp an chhuah mek a ni. He party hian Hindu lalna ram siam an tum avangin Mizoram mipuite hian BJP leh a thawhpui NDA Alliance hi zirchiang a, India ram Prime Minister-in Hindu Sakhua a vawrh lar dante leh a hmalakna te en hian keini kristiante nen chuan engti kawng mahin a inmil ngai dawn lo a ni tih hi hriat a tul a ni, an ti bawk.