ZALEN September 1, 2023 : Mizoram AAP chuan sawrkarin jail a enkawl dan an duh loh thu leh tha lo an tih thu an sawi a, thuam tha turin sawrkar an ngen, vawi tam tak hriattir an nih tawh hmuah pawh hmalakna tha zawk a awm lo chu hriatthiam har an tih thu an sawi. Jail tang te trial kalpui chak se jail tang pawh hi a ziaawm phah an beisei.

AAP chuan an dinchhan ber chu chanhai zawkte tan aw chhuah ve a nih thu leh vawiina-a Jail a hrehawm taka tang mekte chu Kristian nihna ang leh Mihring mihrinna atang pawhin tun aia nasa zawka ngaihsak leh enkawl chu an chanvo anih avangin an auchhuahpui tih an sawi. 

Jail tang te enkawl kawngah thawktu te an indaih lo hle tih an sawi a, Jail warder hna 90 zet a ruak an ti. Jail hotute te sawi danin jail tang te trial hi kalpui chak se la chuan jail tang pawh hi a ziaawm phah an beisei tih AAP Mizoram chuan an sawi bawk. 

Mizoram AAP chuan Mizoram pumah mi 1386 tan thehna turah mi 2125 an tang mek an ti a, heng zinga mi 1765 te hi mia an ni a, hmeichhe tang mek hi 360 an ni. Jail lian ber Aizawl Central Jail-ah hian mi 434 tanna tura ruaahman-ah mi 939 an tang mek.

Hmeichhe tana tur bika ruahman Central Women Jail, Aizawl chu mi 96 tan thehna tura ruahman a nih laiin mi 301 an tang mek a, he jail-ah hian mipa 17 an tang tel tih Prisoners Daily Population Report-ah tarlan a nih avangin he jail-ah hian naupang 17 chu an tang nia ngaih theih a ni.

Hetihlai hian jail panga, Saiha, Kolasib, Lawngtlai, Serchhip leh Mamit District Jail-ah te chuan tang thei tura ruahman zat aia tlem an tang thung a ni.