ZALEN August 27, 2023 : The Ayushman Bharat Digital Mission (ABDM) hnuaia India ram puma health care system te ziahluhna (digitization) kalpui mek a niin he project hnuaiah hian Mizoram chu microsite project din hmasakna ber state a ni. ABDM hnuaiah hian damlo te natdan chi hrang hrang chhinchhiah anih dawn avangin a tangkai hle dawn niin Health dept. chuan an sawi.

Ayushman Bharat Digital Mission (ABDM) hi September ni 27, 2021 khan Prime Minister Narendra Modi chuan India ram chhunga health care system te Information Technology hmanga tih changtlun anih theihnan a tlangzarh a. ABDM hi October ni 1, 2022 atang khan Mizoramah pawh kalpui tan a ni.

ZALEN zawhna chhangin National Health Mission thawk te chuan, "ABDM hi mipui nawlpui ah pawh kalpui tan tum a ni a, ruahman dan chuan thla tharah ZMC ah te hman tangkai hman beisei a ni a. Mahse hei hi a theih chiah ang em a la hriat loh a. Tuna ruahman dan chuan sawrkar hnathawk bik chu kum 2023-2024 ah hi chuan chhinchhiah hman vek beisei a ni," an ti. 

Hetih lai hian inziaklut tur hian document pawimawh neuh neuh a awm avangin heng document pawimawh te hi nei lo te an awm theih avangin ruahman ang hian thil a kal thei ang em tih an hre thei bik lo niin ZALEN an hrilh bawk.

ABDM hnuaiah hian India ram puma healthcare system hi digitization-a kalpui mek a ni a, doctor, nurse, health worker, laboratory thawk te leh hriselna lama thawktute chu chhinchhiah niin ABHA (Ayushman Bharat Health Account) hmangin an damlohna leh inentirna te digital health record siam a ni a. Mizoram-ah pawh sawrkar damdawi in leh health facilities hrang hranga thawk mi 3,61,058 te chuan health account (ABHA) an nei tawh a ni.

National Health Mission Director Dr. Eric Zomawia chuan ABDM hi sawifiahin, "He project hnuaiah hian damlo te kum, natna, lo inekawl tawh dan, an natna lo hmuhchhuah tawh dan leh thil pawimawh dang an health record te chu ABHA number hmangin hriat zung zung theih a ni dawn a. Hei hi doctor leh damdawi in thawktute tan a tangkai dawn bakah reasearch beitute leh policy makers te chuan an chhawr tangkai hle dawn a ni," a ti.