Victoria's Secret Angel hlui Adriana Lima chu a ruak ta tlat lo mai le. Kum 40 mi Brazilian supermodel hian a bialpa Andre Lemmers lakah an fa pakhatna tur a pai a, nau a pai thu hi tun hnai khan social media kaltlangin a tarlang. 

Adriana Lima hian nau a pai leh pai loh a test a, a lo ruak lo hlauh. Phur takin a kawppui Andre Lemmers lam a pan a, a mu lai chu a test result va hmuhin an lawm dun kher mai. Hetia an chetla lai video hi Zirtawpni khan TikTok kaltlangin a tarlang a, lawmpuitu pawh an ngah hle a ni. 
Adriana hi Serbian professional basketball player hlui Marko Jaric nen kum nga lai an lo innei tawh a, fanu pahnih - Valentina (12) leh Sienna (9) te an nei. Marko Jaric nen hian 2014-ah an awm hrang tan a, kum 2016-ah an inthenna hi an tifel a ni.  

Hemi hnu lawk 2016 khan Adriana hian New England Patriots star Julian Edelman a date leh nghal a, MLB player Matt Harvey leh Metin Hara te nen pawh zawi zawm an lo ni tawh thin. Adriana Lima hi Victoria's Secret Angel ni rei ber a ni a, 1999 atanga 2018 thleng khan a catwalk zak zak a ni.Kum 2017 khan 'Most valuable Victoria's Secret Angel' atan thlan a ni a, a kum lehah rei tak a lo chenchilh tawh chu a mangtha zui. Kum 2014 khan khawvela model hlawh hnem ber dawttu nihna a hauh a, a eizawna kawngah hian a hlawhtling rem rem hle a ni.