DOWNLOAD OUR APP

Read latest news on your phone
app-store
Africa pawnah monkeypox thihpui awm ta
Jul 31, 2022

khawvelah MONKEYPOX

May thla tir lama a darh hnuah monkeypox hi khawvel ram hrang hrangah hmun an pung zel a. Brazil-a health ministry chuan a vei mi 1,000 dawn an neih tawh thu leh a tam ber hi chhimchhak lama Sao Paulo leh Rio de Janeiro state-ah a ni a. United States leh Canada ram chu America rama monkeypox-in a tihbuai ber zinga mi an ni bawk.

Tun tuma he hri leng hi May 7-a United Kingdom-a a vei hmuh atanga intan kha a ni a, World Health Organization (WHO) chuan Africa khawthlang lei lailia awm ram bak hmun dangah a vei tam tak an awm tawh thu a sawi zui.

Chawlhkar khat chhunga khawvel ram 78-ah a vei mi 18,000 hmuh chhuah an nih hnuah WHO chuan global health emergency a puang zui.

A vei zinga 70% chuang chu Europe-ah a ni a, 25% chu America-ah a nih thu WHO chief Tedros Adhanom Ghebreyesus chuan Nilaini khan a sawi.

Khawvela a darh chak em avangin WHO hian Nilaini khan a vei awm tamna ramte sawipuiin mipa leh mipa inkawpte chet dan en uluk lehzual ni se an ti.

Monkeypox vei hi an khua sang takin a sik a, an tha a thum a, chickenpox vei ang deuhvin an khaw hmuh a fiah lo thin.

He hri hi amahin chawlhkar hnih atanga thum chhungin a dam mai thei a, dam var tur erawh chuan thla lai pawh a lai thei.

Denmark-a damdawi siamtu lian, Bavarian Nordic-in zawnghri danna an siam, US-a Jynneos an tih leh Europe-a Imvanex an tih hmangin a inven theih a ni.

July 31, 2022 : Spain leh Brazil-ah mi pakhat ve vein monkeypox an thihpui nia sawi a ni a, hei hi May thla tira khawvela he hri a darh hnua Africa pawn lama thihpui an awm hmasak berna nia hriat a ni.

Spain hi he hriin a tihbuai ber ram zinga mi niin a vei mi 4,298 an awm tawh niin an ram health ministry-a emergency and alert coordination centre chuan a sawi.

“An zinga mi 3,750 chu ina inenkawl niin 120 (3.2%) chu damdawi ina awm an ni a, pakhatin a thihpui,” tiin Zirtawpnia centre-in report a siamah a tar lang.

Health ministry thupuangtu chuan thihpuitu chanchin kimchang a sawi lo va, a ruang endik thuai a ni dawn tih a sawi.

Brazil-a monkeypox thihpui hi mipa kum 41 mi a ni.

Health ministry chuan amah hi lymphoma nei sa leh taksa chak lo sa deuh niin an sawi.

An ram chhimchhak lam, Belo Horizonte khawpuia damdawi ina dah niin hniam lam pan zelin intensive care unit-a dah a nih hnu lawkah a thi tih an sawi.

“Natna benvawn dang nei sa a ni a, mipuite tan chiai phahna tur a awm lo va, a vei zinga thihpui hi an tlem hle a ni,” tiin Minas Gerais health secretary Fabio Baccheretti chuan a sawi.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh