Aizawl: Agriculture Minister C. Lalrinsanga chuan nimin khan Johnson Diesel Sales & Services Depot, Sihhmui atangin Mizoram hmun hrang hranga loneitu ten a Custom Hiring Centre kaltlanga an huan, lo leh leiletah te an inhmantawm thei tur tractor, power tiller, mini power tiller leh khawl chi dang hrang hrang a vailiam.

Agriculture Minister C. Lalrinsanga chuan COVID hripui leng karah Sawrkar leh Department chuan loneitute kawng hrang hranga dawmkan, chawhphur leh fuih tumin hma an lak mek thu a sawi a, chung zinga pawimawh tak chu an thlawhhma leh leilet te awlsam tak leh awmze nei zawka khawl hmanga an buatsaih leh an enkawl theih nana khawl hrang hrangte ngaihtuahsak a ni tih a sawi. Minister chuan khawl tam zawk chu zauah loneitu ten an inhmantawm tur angin ruahman a ni tiin hengte hi mimal ta, neih zawnga tih chi a ni lova, Custom Hiring Centre a khawl te chu a nihna ang taka an tharchhuah tihpun kawnga hmang tangkai turin a chah a. Sawrkar in heng khawl man te hi za zelah 95 a tum avangin an hman tangkai loh leh an hluihhlawn mai chuan a la let thei tiin loneitute leh beneficiary te chu khawl te hi sal anga chhawra, fa tlum anga duat turin a fuih a ni.

Agricultural Development Board Vice Chairman leh MLA ni bawk H. Biakzaua pawhin thu sawiin ram intodelhna chu loneitu leh kuthnatawktute kutah a innghat a, khawl te hi tangkai taka tharchhuah tihpun nan hmang turin beneficiary te a fuih a ni. Programme hi Agriculture Secretary J. Hmingthanmawia, IAS in a kaihruai a ni.

Kum 2013-14 atanga 2021-21 thleng, Department in loneitute tan subsidy in Power Tiller 1110 leh Mini Power Tiller 354 an pechhuak tawh a. Kum 2013-14 atangin loneituten khawl inhmantawn theihna Custom Hiring Centre 181 din tawh niin tun tumah hian CHC 52 te tana khawl pekchhuah tum niin hma alo lak tawh nen a vaiin CHC 233 a tling tawh dawn a ni. Heng Custom Hiring Centre ah te khawl man to bik Tractor te, lei lehna hmarua te leh buhseng-khawl te a ni.