Aizawl July 30, 2024 : Centre for Environment and Social Justice (CESJ) Mizoram chuan mipui ten thlai leh thei an leiin damdawi rim nam leh rannung thahna hlo (Pesticides) hnu hma a tel ngei niin an hria a. Mizo mipui him nan tiin Rannung thahna tur leh hlo tur khuahkhirh turte, Mini Lab siam tur leh zirchianna nei tur vawiin khan Agriculture Minister PC.Vanlalruata hnênah rawtna an thlen.

CESJ te chuan rannung thahna hlo (Pesticides) leh a vawn thatna (Preservants-Chlorine Hydrogen Peroxide, Trisodium Phosphate, Sulphites etc…) te hian mihring hriselna nasa takin a nghawng thei a, Cancer, khawsik, lu na, hritlang awmna / hrawk leh hnar za, vun natna hrang hrang, nerve tha lo, ruhchuktuah na, asthma leh sinus adt… nasa takin mihringah a thlen thin tih mithiamte zirna atangin hmuh chhuah tawh a ni, an ti.

Mizoram-ah di hlo kan tih hlo tur kan hmang nasa hle bawk a. Mahni lo leh huan hnim leh kawngkam hnim suat nan Mizoram hmun tinah hman a ni a. Hlo tur hi misual ten lui nungcha hrai nan an hmang thin bawk a. Lui tui ringa nung Mizote tan thil rapthlak tak a ni. Hnam anga hrisel lohna hrang hrang tam lutuk te hi hlo tur leh rannung thahna hlo bakah damdawi hmanga thlai vawn that an hman uar vang a nih a rinawm a ni, tiin, a hnuaia point-3 an tarlante hi Mizo mipui him nan tiin Agriculture Minister hnênah an thlen a ni.

1. Rannung thahna tur leh hlo tur khuahkhirh: A tulna chhan chu- thei leh thlaia damdawi rim nam hi ram dang leh state danga tanga lo lutah nge, keimahni tualchhunga chingtu ten rannung thahna hlo leh hlo tur an hman vang tih hriat a nih loh vangin.

2. Quarantine Check Gate ‘Mini Lab’: Kan ramin state dang aṭanga thlai leh theirah kan lak luhte a hrisel em, damdawi hmanga sawngbawl a ni em tih en dikna, Vairengte, Bairabi leh Zokhawtharah te a rang thei ang bera din.

3. Zirchianna (Research): Thlai leh thei bawmtu rannung thahna hlo tur, di hlo / hlo tur, leh thlai vawn ṭhatnate hian, Mizo mipuite hriselnaah leh Environment ah engti angin nge nghawng ṭhalo a neih tih zirchian ngei ni rawh se.