March 19, 2024; Local Council & All NGO, Ainawn veng chuan Daniel Sailo, MCS chu Ainawn veng khua leh tuia an pawm theih loh thu leh an mi leh saa an ngaih loh thu thuchhuah an siam...

PRESS RELEASE

Daniel Sailo s/o Lalsailova Sailo chungchangah Local Council & All NGO, Ainawn veng chuan Press Release hetiangin a siam.

Tunhnaia Ainawn venga thil thleng chungchangah Daniel Sailo, MCS in Local Council leh NGO hruaitute hmusit leh diriam taka tawngkhuma, zahlo leh thamlo taka minlo hmachhawn hi mak kan tiin kan hrethiamlo takzet a ni.

Daniel Sailo hian Ainawn vengah In leiin August 2023 atang khan an inbengbel a, Local Council leh YMA in tum engemaw zat pem lehkha kan dil pawhin pem lehkha neih țul a tih loh thu te, YMA engah mah a ngaihloh thu te sawi a, an awmna Section hruaitute vawi tam hmusit leh chapo taka a lo tawngkhum thin hi mak kan ti a. Khawtlang inrelbawina leh kaihhruaina engah mah a ngailo a, khawtlang hruaitute hmusit taka tawngkhuma a lo diriam thin hi a lungawithlak loh hle a ni.

Ni 14/03/2024 Ningani zanah Daniel Sailo te hian an in kawta lei laiin leivung hi Dumping Ground atana ruahman nilo ah an paih a, Local Council in a hriat rualin a paih chhan zawt tur leh paihna hmun a nih loh thu hrilh turin Section hruaitu pahnih lamkal ah a tir a. Daniel Sailo hi a lo mu tawhin, a nupuiin lo dawng sawng a. Local Council te nen pawh phone hmanga inbiak zui a ni. Tha taka inthlah nia kan ngaih laiin a tuk Ni 15/03/2024 Zirtawpni tlai lamah Daniel Sailo hian Section hruaitute hi an inah kal chilhin, darkar khat chhunga ngaihdam an dil lo anih chuan FIR thehluha vauin kutthlak duh hial khawpin a che zui a ni.

Hemi boruak hi hriain Ni 15. Zirtawpni zanah Daniel Sailo hnenah thil awmzia sawipui a, hrilhfiah ngaite hrilhfiah turin Local Council leh YMA hruaitute len zui a ni a, Daniel Sailo hian khawtlang hruaitute hi chapo leh hmusit tak a lo dawngsawngin Ainawn venga hmuhsit thu leh engahmah a ngaihloh thu te, Ainawn venga phum a duhloh thu te, chenna tlaka a ngaihloh thute sawiin tawngkam chhia chi hrang hrang hmangin khawtlang hruaitute a lo tawngkhum a, thu tha engmah sawipui theih anih loh avangin khawtlang hruaitute hian rilru na takin kan haw san a ni.

Ni 16/03/2024 zingkarah Zonuam Police Out Post ah kan hruaitute laka diklo taka FIR a thehluh zui avang te, kan khawtlang hruaitute laka a rilru put hmangte leh kutthlak duh hial khawpa a chet avang te, Ainawn veng mipui leh khawtlang mipui hmusita engahmah a ngaihloh avangtein Daniel Sailo hi Local Council, All NGO leh Ainawn veng mipuite chuan khawtlanga chenhopui tlakah kan ngai biklo a, a nundan leh chet duhdan enin thenawm khawveng, upa leh tar chaklo, nunau te tan pawh a him tawk loah kan ngai a ni.

Heng a chunga kan sawi tak hrang hrangte avang hian Daniel Sailo hi Ainawn veng khua leh tuiah kan pawm theilo a, kan mi leh saah kan ngailo a ni.