Aizawl March 24, 2024 : Ainawn Veng (Govt. Complex), Aizawla sawrkar building/quarter-te chu mihring chenna atan a him tawk tawh lova hriat a nih avangin thiah tura ruahman a ni a. Building thiah hmasak tur pawh ruahman fel a ni tawh.

Mizoram sawrkara General Administration Department (GAD)-in hriattirna a chhuah a tar lan a nih danin quarter thiah hmasak turte hi L-I/7/A-D, L-I/8/A-D, L-I/9/A-D, L-I/ 13/A-D, L-I/18/A-D te an ni a, heng quarter luah mekte chu order chhuah (March 11, 2024) atanga thla khat chhunga an chhuahsana lo tiruak vek tura hriattir an ni.

Hun tiam ral hnuah chuan a hranpa a inhriattir ngai tawh loin sawrkarin a thiat zui tawh ang.

June 22, 2023 khan GAD chuan Ainawn Venga sawrkar quarters type I, II, III leh IV luahtu chhungkaw za chuangte chu ni 60 chhung ngeia an chenna chhuahsan turin a lo hriattir tawh a. June 18, 2023-a council of ministers thukhawm chuan building/quarters-te chu chhiatrupna thleng thei pumpelh nan building-te tihruaha thiah nghal nise tiin thutlukna a lo siam tawh bawk.

Hemi hnu hian quarters luahtu, sawrkarin chhuahsan tura a tihte chu December 31, 2023 thleng pawhseisakin quarters luahtute chu an himna turin hun tiam nghak kher lovin a rang thei ang bera chhuahsan tura hriattir an ni.

Sawrkarin hun tiam a pawhseisakah hian building panga huam loh a awm thung a, chungte chu thiah hmasak tura ruahman a ni a. A dang pawh a tahtawla thiah tur a ni, tunah hian Ainawn Veng-a sawrkar quarters luah hi chhungkaw 180 bawr an awm mek.