Aizawl: Mizorama internet provider pahnih, Airtel leh Reliance Jio chuan hun reilo teah 5G pek chhuah an tum tih an sawi.

Zirtawpni khan khan Mizoram chhunga 5G Network Roll Out hmalakna kal zelah Mizoram sawrkar, ICT Department leh Department of Telecommunications, Govt. of India tangkawp te buatsaihin Secretariat Conference Hall, Main Building, MINECO, Aizawl-ah ‘One Day State Level Workshop on 5G Roll out’ neih a ni.

Workshop-ah hian Neeraj Kumar, DDG (National Broadband Mission) (NBM) chuan 5G service chungchangah presentation pein ‘5G network, fifth generation telecom network technology’ chu internet speed chak leh bandwidth sang tak a nih thu leh 5G technology chu mipuite nitin nun leh khawsakna bakah kawng hrang hrangah hmasawnna thlen theitu a ni dawn tih a tar lang.

C. Lalhmachhuana, Director, NELSA, DoT, Govt of India pawhin presentation pein telecommunication service chungchanga Mizoram dinhmunte sawiin, Mizoram chhunga mobile connectivity tihchangtlunna tura hmalakna kal mek leh harsatna awm thin hrang hrangte a sawi.

ICT Department chuan Mizoramah internet connectivity tha zawk a awm theih nan chak takin hma a la mek a, 5G service kan hman ve thuai theih nan October 31, 2022 khan sawrkarin ‘Working Committee for Roll out of 5G Network’ a din tawh a ni.