December 12, 2022; December 12, 2022; Vawiin atangin Traffic dan bawhchhia, inngaihnathiamna awm lo a endik runpui, No Tolerance Drive/Checking chu Aizawl khawpui chhungah kalpui tan a ni a. No Tolerance Drive hman a nih avang hian, lirthei document fel lo thahnem tak chu Transport office leh pollution certificate siamna hmun ah te document tifel turin an pung khawm a ni.

Aizawl Traffic Police leh Transport department-a enforcement staff-te chuan vawiin chawhma lam atang khan inngaihnathiamna tel loa lirthei enfiahna, No Tolerance Drive an kalpui a, traffic hotute chuan, Krismas leh kumthar mi tinin dam leh hlim tlang taka an hman theih nan Aizawl khawpui chhung remchang laiah dan bawhchhia, a bikin zu rui chunga lirthei khalh, zial zu chung leh mobile phone hmang chunga lirthei khalh, phur rit lutuk, lirthei chak lutuka khalh leh document fel leh fel lo an enfiah tih an sawi a, hei hi krismas hma chuan ngawrh takin an kalpui zel dawn niin an sawi.

Krismas leh 2023 kum thar hman turah mipui himna tur leh ralmuang taka hman a nih theihna turin tunlai hian chhun leh zanah Police ten hmalakna an kalpui ngawrh hle bawk a, lirthei veivak, a bikin zan lamah enfiah hna an kalpui mek a, a bikin rui chunga lirthei khalhte chu a na thei ang bera hremna pek an ni a, hei bakah hian, foot patrolling kalpui mek a ni bawk.