Aizawl May 4, 2024 : Aizawl khawpui chawmtu Tlawng tui chu tun hnaiah ruah a sur zauh zauh avangin tui a tlem lo a; mahse, thli tlehin power line a tihchhiat fo avangin PHE chuan harsatna an tawk thung.

ZALEN-in PHE thawktute hnen atanga thu a dawn danin Tlawng tui hi a tam a, pump chhuah kawngah chuan harsatna a awm lo a. Mahse, tun hnaia to leh thlipui tlehin power line a tihchhiat thin avangin duh angin tui hi an pump thei lo tih an sawi a. Power & Electricity department lam atang chuan power hi hmu tha mah se line thenkhat trip leh thing leh mau tluin line tihchhiat a neih thin avangin duh angin an pump thei lo niin an sawi bawk.

ZALEN zawhna chhangin tun hnai ruah surah khan tui a nut nasat avangin harsatna an tawk tih an sawi bawk.

“Phase I pump-na, Serluiin Tlawng a finna laiah hian Serlui tui nu lutuk avangin harsatna kan tawk a. Phase I atanga hip ngaihna a awm lo a; mahse, phase II atangin kan siam rem ta mai a ni,” tiin PHE officer pakhat chuan a sawi.

Tun hnai ruah surah khan Tlawng lui hi a nu nasa hle a, a tui nut zawng hi NTU (nephelometric turbidity units) 1,429 lai niin an sawi a, hei hi filter atana tlak loh khawpa nu a ni.

Tui nut zawng tehna, NTU 800 vel hi pump tlaka ngaih niin an sawi a. Heti taka Tlawng a nut chhan hi Tlawng fintu lui leh kawrah te leivung leh bawlhhlawh paih nasat vang niin an sawi.

Aizawl khawpui chawmtu Greater Aizawl Water Supply Scheme phase I leh II te hian tluang taka chhun zan zawma tui an pump chuan ni khatah tui litre maktadui 34 (34 mld) an pump thei a. Mahse khawl hi chawlhtir ve seuh seuh a ngaih avangin ni khatah mld 29 vel pump tir a ni thin.