Aizawl May 22, 2024 : African Swine Fever (ASF) avangin vawiin khan Mizoram-ah vawk 46 an thi leh a, hrikai tihlum (culled) vawk 38 an awm bawk a, ti hian ASF avanga vawk thi tawh zat hi 2220 a tling.

Nimin thlenga vawk thi tawh zat chu 870 an ni a, thi 46 an awm belh leh tak avangin vawk thi hi 916 an tling ta a, nimin thleng khan vawk tihhlum hi 1143 an ni a, vawiina mi leh a hmaa vawk tihhlum chhiar tel la ni lo vawiina an puan tak 123 te nen ASF hrikai rinhlelh tihhlum tawh hi 1304 an tling a ni.

African Swine Fever hi tun dinhmunah Champhai, Aizawl, Lunglei, Saitual, Khawzawl leh Serchhip district-ah te a la leng a, Siaha, Lawngtlai, Kolasib, Mamit leh Hnahthial te chu him riha ngaih an ni.

Vawiina vawk thihna hi Ramhlun Sports Complex, Aibawk, Thingsul Tlangnuam, Zemabawk leh Falkland a thi te an ni a, Vawk hri kai an tihhlum Culled na veng te chu, Republic, Lawipu, Tlangnuam, Zemabawk, Tualte, Chhingchhip leh Khumtung-ah te an ni.