Rochamliana, Mission Veng

Tunhnaiah luia leivung leh bawlhhlawh lut nasa avangin Tlawng Lui a nu nasa leh ta hle tih kan hria a. Chumi avang chuan Public Health Engineering Department (PHED) tui pump pawh hun engemaw chen a khaihlak tihte kan hre bawk a. Hetiang thil hi a thlen lohna turin kum hnih liam taah khan khatih hunlaia Aizawl Bawrhsap kaihhruaina in hmalakna mumal tak neih a ni tawh a. Amaherawhchu, hun a liam a, hotute an inthlak a, mar taka tan zui a nih loh chuan hmalakna tha

Kum 2020 kum laihawl chhovah, COVID 19 hripuiin Zoram a rawn thlen tan ve mek lai khan Aizawl dai hmun engemawzata leivung paihin lui thenkhatte tan harsatna a thlen theih thute, a bik takin Mission Vengthlang dai leh Tlawng Lui (Reiek Kai) inkar kawngpui sir hmun engemawzatah leivung leh bawlhhlawh paih a nasat avanga PHED enkawl, Tlawng Luia Aizawl khawpui chawmtu tuilaknaah harsatna a thlen theih thute chu Aizawl Bawrhsap ho va thukhawm Save Chite Lui Special Meeting-ah sawichhuah a ni a. Aizawl Municipal Corporation (AMC) aiawh ten AMC in Aizawl khawpui chhehvel mimal rama leivung paihna hmun atana phalna an pek dan te leh harsatna hrang hrangte an sawifiah bawk a. Thurel tur pawimawh dang awm nual karah chumi thu bik chu a hranpaa sawi atan khek a ni ta rih a. 

May 11, 2020 (Thawhtanni) ah khatih hunlaia Aizawl Bawrhsap hovin a pisa-ah chu harsatna chungchang chu a kaihhnawih sorkar department-te leh tlawmngai pawl hruaitute nen sawiho a ni ta a. Engemaw chen sawiho a nih hnuah Bawrhsap chuan, “Heti ngawt chuan a chiang lo deuh em mai a, a hmunah ngei enfiah ni se a tha ang,” tia rawtna a siam chu bawhzuiin Joint Inspection Team siam a ni a, Inspection Team kaihruai tur hian khatih hunlaia Addl. DC pahnih zinga pakhat zawk chu ruat a ni.

Inspection Team-ah hian Aizawl Bawrhsap office, Aizawl SP office, AMC, PHED, DM&R Department, UD&PA Department, I&PR Department, Mizoram Pollution Control Board, Aizawl District Disaster Management Authority, Aizawl City Local Council Association leh Save Chite Lui Coordination Committee mi leh sa te an tel a ni.

May 14, 2020 (Ningani) chawhma dar 10:00 atangin leivung paihna hmun hrang hrangte enfiah a nih hnuah chawhnu dar 2:30-ah Team Leader pisa-ah thutkhawm zui a ni a. Aizawl atanga Tlawng Lui (Reiek Kai) inkar, Tlawng Road tia hriat lar hmun bikah chuan hetiang hi an thil hmuh dan tlangpui te chu a ni:  

1. Aizawl atanga Reiek kalkawng, Maubawk ram huam chhung, Bulbule Lui piah a mimal rama leivung paihna hmun chu Inspection Team-in an tlawh hmasa ber a. Helai hmun hi dan lo va a ruka leivung, bawlhhlawh, ran thi leh ekthli thlenga an paih thinna hmun a ni. Kawngpui sir khamah heng bawlhhlawh chi hrang hrangte hi paih a ni a, chung thil tawlh thla zel chuan Tlawng Lui a zuk tibawlhhlawh pha ta hial thin a ni.

2. Ar Lei khama dan lo va leivung leh ran thi thlenga paih a nih thinna hmun chu enfiah leh a ni a, helai hmun hi Maubawk ram chhunga awm a ni. Kawngpui sira leivung leh hnawmhnawk dang tawlh thla zel chuan Tlawng Lui tan harsatna a siam thin a ni.

3. Chawndenga Lui chhehvela leivung paihna chu enfiah a ni a. Chawndenga Lui hnar lam hi Paparpi Lui tia hriat a ni bawk niin ram chin hriaten an sawi. Helai hmun hi Tlawng Road, Bungkawn Thlanmual thlang, Maubawk Tamdo ram mawnga awm a ni a, AMC phalna a leivung an paih thinna hmun a ni. Helai khamah hian leivung a lo tla tam tawh hle mai a. Chung leivung te chu Vailuiah a lut a, Vailui tuinu leh chirhdum inpawlh chu a thlanga Sakhisih Luiah a lut a, Sakhi Sih Lui atangin Nghaltan Luiah a lut a, Nghaltan Lui atangin Zawng-kawt Luiah a lut leh a, Zawngkawt Lui atangin Serluiah a lut a, Serlui atangin Tlawng Luiah a luang lut ta thin a ni. Chuvangin, 8.5.2020 khan AMC chuan helaia leivung paih phalna a pek chu a lo titawp tawh nghe nghe a ni.

4. Maubawk Tamdo Ram mawng, Mission Vengthlang rama Sports Authority of India (SAI) Hostel nen inep renga awm, mimal rama leivung paih na chu enfiah a ni a. Helai hmun hi AMC phalna a leivung an paih thinna hmun a ni. Helai khamah pawh hian leivung a lut tam tawh a, leivung chuan a thlanga Vailui a ti bawlhhlawh a. Vailui lui tui bawlhhlawh chu a thlanga Sakhisih Luiah a lut a, Sakhi Sih Lui atangin Serluiah a lut leh a; Serlui atangin Tlawng Luiah a luang lut ta zel a. Chuvangin, 8.5.2020 khan AMC chuan helaia leivung paih phalna a pek chu a lo titawp tawh a ni.

Inspection Team Report atangin hmalak zui dan tur ruahman a ni a, bawhzui ngaite pawh bawhzui a ni bawk a. Tlawng Road-a leivung, bawlhhlawh, ran thi, ek thli leh hnawmhnawk dang tam tak paih a nih tawh lohna tura hmalakna hmasa atan vengtu indah phawt mai ni se tih a ni a. Lawipu Kawn (Vety Department quarters bul) ah leh Tlawng Road-a Nursery leh Khatla South veng pa-hnih inrinaah te chhun zan zawmin vengtu indah a ni ta a, chhun leh zanah a inchhawkin duty-te hi inthlak tura ruahman a ni nghe nghe a. 

Duty-te lawmman tur chu AMC hnenah ngen nise tih a nih angin Aizawl Bawrhsap-in AMC-ah ziakin a thlen a. Duty turte lo ngaihtuah turin Maubawk Local Council-te ngen an ni bawk a. Chutiang chuan thla engemawti chhung chu leivung leh hnawmhnawk dang paih thinte veng turin chhun zan zawmin ngawrh taka duty a ni ta a. An duty chhungin thil eng engemaw an tawng nual a, sawi chhawn leh nuam lem lo takte pawh an tawng a, Maubawk Local Council-te inpekna a fakawm takzet a ni.   

Duty-ten langsar taka an awrh turin badge siam a ni a, mi luhlul leh huaisar fal an tawng fuh a nih chuan Aizawl SP hnenah rang taka report nghal zel tura tih a ni nghe nghe a.  

Anni bakah hian PHED pawhin tuilakna ber anih avangin department sumin thla thum chhunga duty turin casual worker pahnih tal chhawr se tih a ni a. PHE mi chhawrte bik hi chu hmun khatah thu lo vin Tlawng Road-a bawlhhlawh paihna hmun hrang hrangte fangkual thin tura ngaih an ni thung a — hei erawh hi chu tihhlawhtlin a ni ta chiah lo a ni mai thei e.

Tlawng Road-a leivung paih thinna laite hi a hming tal pawha hung a tul hle tih a lang reng mai a, thingzai hmangin a remchan dan angin pal siam a hung an ni ta a. Tin, leivung paih phal a nih tawh loh thu inziahna signboard lian tha taka tar a ni bawk a, hengte hi AMC hmalaknaa tih an ni.    

Inspection Team-in a duhdanah phei chuan duty-te hian mumal takin register an vawng ang a, lirthei hmanga bawlhhlawh paih tum lokalte reng reng chu let tir mai lo vin an lirthei number, motor neitu hming, contact number leh address, motor khalhtu hming, contact number leh address-te kimchang takin an lo ziak ang a. Chu chu Aizawl Bawrhsap office lamin insawifiah turin an ko thin dawn a ni. 

A chunga kan sawi tawh ang khian AMC chuan Tlawng Road-a leivung paihna hmun atana a lo phalsak tawhna hmunte chu a ennawn vek a, thu leh awm hma chu heng laiah hian leivung paih a khap ta bawk a ni.

Heng hmalakna hrang hrangte hian hun rei tak chhung chu Tlawng Lui venhimna kawngah pawh awmzia a neih phah hle niin a lang a. Hotu hrang hrangin a khat tawkin Tlawng Road hi an tlawh zauh zauh va, kei ngei pawhin tum engemawzat ka zuk tlawh ve thin a. A hunlai kha chuan kawng sira leivung tharlam leh hnawmhnawk paihna hnuhma thar hmuh tur a vang a, a lawmawmin a thlamuanthlak hle a ni. 

Amaherawhchu, COVID 19 hripui avangin chet chhuah a lo harsa chho va. Tin, sawi leh sawi hnu, a bik takin sorkar lam atangin hmalakna hi mar taka a kal reng loh chuan a buaithlakna chin a awm thuai thin a. Engpawhnisela, Aizawl khawpui tuia min chawmtu Tlawng Lui humhalhna tura ruahmanna awm tawh sate hi a theih ang anga tuaithara chhunzawm leh a tul hle a ni.