ZALEN September 17, 2026 : Periodic Labour Force Survey 2024 chhut danin Aizawl khawpuia mi hnuaia inhlawhfa za zela 44% an awm a, sawrkar hnathawk leh mumal taka hlawh la za zela 9% an awm thung.

PLFS 2024 data tarlan danin Aizawl khawpuia hnathawh nei mek zinga za zela 47% (60544) chu mahni hna thawk (self employed) an ni a. Mi hnuaia inhlawhfa (casual labour) chu za zela 44% (56928) niin, sorkar hnathawk emaw regular a hlawh la pangngai chu za zela 9% (12080) an awm a, sawrkar emaw Private company changtlung tak nilo a hnathawk an tam zawk a ni.

Retheihna avanga sawrkar in a dawm kan mek zingah, AAY chhungkua mi 3729 awmin PHH hi chhungkaw 36,129 vel an awm a. A mihring ang zawng chuan mi Nuai 1 chuang chu AAY leh PHH card hmanga buhfai la an awm a ni.

Hna kanglang leh nghet lo thawktu (Informal workers) sawrkar in a chhinchhiahna portal, E-Shram portal ah mi engemawzat an in ziaklut ve tawh a. Hetah hian insak leh cement hna lam khawih hi a tam ber niin mi 2500 vel an inziaklut tawh a, lirthei a eizawng te leh awmpui hna thawktu te an inziaklut ve bawk. 

Census 2001 atanga 2011 data atanga mihring pun dan hisapin Aizawlah kum 2024 ah mi 4,06,228 awm anga chhut a ni a. Heng zinga 72% vel chu hnathawk thei rual (kum 15-59) an ni. Mipui zawng zawng atang hian hna thawk thei, thawk mek leh thawh tur zawng mek belkhawm chu 50.60% a ni a.

 Hna thawh mumal tak nei chu 47.96% a chhut a ni. Heta tanga thawk lo zawng hi 2.63% an awm thung. Hna thawk thei lo naupang, kum upa, zirlai, ramtuileilo leh hna thawh tur zawng lo hrim hrim chu 49.40% in chhut a ni.