ZALEN September 15, 2023 : Aizawl Mihlun Thlahte High Council 2023 chu vawiin khan neih a ni a, Aizawl cheina leh hmasawn zelna atana Aizawl luhka-a Welcome Gate siam te, Chanmari leh Tlangnuam-a 'AIZAWL' tih tar te leh Bawrhsap Pisa Pui a ngai ang thei ang bera sak that an duh tih an rel.

Aizawl Mihlun Thlahte chuan AMC Mayor an hmuhna kal zelah Aizawl rawn chuanglut te lo lawmna Welcome Gate a remchang laiah siam tha an ti a. Laipuitlang Kraws Lian tarna hnuai, Chanmari ramchhungah leh Tlangnuam-ah te 'AIZAWL' tih langsar taka hmuh theih tura tar tha an ti. Mayor hian vawiin hian High Council Meeting hi a hmanpui, Aizawl Mihlun Thlahte buatsaih 'Hei Le Aizawl' tih chu a tlangzarh bawk.

Assam Rifles chhuahsan tur ram humhalh leh Aizawl Bawrhsap Pisa Pui kang bang, a ngai ang thei ber tura sak tha an tihna chu anmahni chauha hma la lo in; INTACH Mizoram Chapter leh Aizawl Hmathlir Pawl te nena thawhhona kawng zawn tha an tih angin Working Group Committee an din. Joint Resolution an siamah chuan Assam Rifles chhuahsan tur ram hi an chhuahsan fel hma chu Mizoram Sorkarin kutthlak lo se an duh thu leh Aizawl Bawrhsap Pisa Pui chu a ngai ang thei ber tura sak tha an tih thu resolution an pawm tlang a ni. 

Lirthei pung chak lutukah hian Aizawl Traffic jam buai chu mitinte harsatna tawh anih avangin; tunhnai maia traffic jam tih ziaawmna tur kawng dap tlan hi a tul an ti bawk a, vawiina kalkhawmte pawh hian ngaihtuahna chhawr tlak neih tha an ti bawk.