Kan ram chhunga pi pu sulhnu leh kan rochun thil dang humhalh leh venhim hi INTACH Mizoram Chapter te thupui ber a nih rualin, mihring siam ni lo, khuanu kutchhuak – tlang leh lui te, ramngaw leh nungchate, Sappui tawnga ‘natural heritage’ an tih – humhalh hi a serh zinga a mei angah ngaiin an hmer tel vek a ni. Environment (kan bulhnaia thil min hualtu) leh natural heritage hi thil thuhmun emaw tih a awl hle; natural heritage hi environment pum puia tel ve (component) pawimawh tak pakhat a ni ti ila, kan hrethiam mai awm e. Chhuanmang rorela chet hi Mizote zepui pakhat a nih avangin, kan thing leh mau, ransa leh nungcha dangte kan suasam dan hi a namenlo hle! Kum tina ram kan tihkan nasat dan hian a sawifiah hle awm e. A humhalh zawnga tan laknaah tumah bang thei kan awm lo vang. INTACH Mizoram Chapter-ten kum li/kum nga kalta atanga an vei ber pakhat chu Aizawl khawpui chhunga mipuite thawklakna awmchhun, ni tina morning walk leh jogging tithinte tana hmun remchang, khawtual leh tourist-ho tana khawthlirna hmun nuam, Chanmari – Chaltlang Dawrkawn Road leh Bawngkawn – Durtlang Leitan Road tihchhiat meka awm, humhalh leh venhim hi a ni. Heng hmunte hi kan natural heritage tlemte la awmchhun an ni awm e. Khawpui miten kan mamawh ber pakhat chu hmun thawveng (open space), boruak thianghlim duhtawka hip theihna leh khawthlirna hmunte hi a ni. Aizawl khawpui thang zelah hian chutiang khawhawina hmun chu a bo tial tial a; Aizawl khaw lailiah phei chuan heng hmun pahnihte bak hi chu awm alawi a awm tawh lo a ni ber. Aizawl Master Plan – Vision 2030-ah chuan hetiang hmun ang, Park te, open space leh recreation centres kan mamawh zat leh neih theihna hmunte ruahmanna a awm vek a; mahse, la tihpuitlin loh a la ni rih. Chuvangin, tuna kan natural heritage neihchhun hi kan humhalh a ngai takmeuh a ni. Kum 2010-ah tawh khan INTACH Chapter chuan ADA hnenah zualkovin, heng kawngpui dung pahnih chhak leh thlang lama in sak khuahkhirhna dan awm thei se; kawngpui atanga 50 ft aia hlaah chauh phal nise, kawngthlang lama in (building) top floor pawh kawng atanga 20 ft rawn pel lo se tiin rawtna a siam. Building permission pek a tul a nih pawhin, Geologist certificate phut nise an ti bawk. He rawtnate hi ADA-in ngun taka a ngaihtuah hnuah Chief Minister Chairman-na hnuaiah a pawmpui ta a. Hei hi ADA Building Regulations leh Aizawl Master Plan – Vision 2030-a sengluh rem tih a ni nghal bawk. Hetiang khuahkhirhna an rawt chhan chu, kawngthlang lam building top floor-in kawngpui a an chuan, motor parking nan te, vawk leh ar vulh nan te, thlai chin nan te, puan pho nan te kan hman ngei thin avangin, he lai hmunte hi khawthlir nan a hmantlak dawn lo va, a tawpin a rimchhe dawn bawk si!} A takah erawh chuan, chung khuahkhirhna dan chu zawm a ni ta lem lo va, vawi duai lo ADA leh Chief Minister hnenah an zualko chungin. Chutah ADA thlaktu AMC a lo piang a; tichuan, a ngaitein, AMC lamah an umzui leh a. Nimahsela, kum 2011 November thla khan Chanmari – Chaltlang kawngdunga in pakhat chuan he dan hi bawhchhiain kawngpui level-a in sak mek roof top leh a hnuai floor chu, public parking atan AMC chuan permission a lo pe a, chu mai bakah pedestrian footpath pawh, in chhung dung chen zet a thiat tel bawk a. Sorkar hnenah leh AMC hnenah INTACH pawl chu an zualko leh vat a; chubakah Central YMA an pun nghal bawk a. CYMA-in an phungbawm tha hle chungin eng an ang thei ta chuang lo. The AMC Act, 2007-ah hian AMC-te thu tihthluk tawh sorkarin a over rule theihna provision a awm lo ni maw, bui lung su an sawi ang chauh an ni leh ta a ni. Tun hnai atang khan Bawngkawn – Leitan kawngpui dungah lah in sak runpui a thleng ta emaw tih turin, ram neituten hma an la nasa hle mai a. Kum 2012 April ni 19 khan Chapter member-ten he lai hmun leh heritage hmun dangte an tlawh kual a; Haflong Veng vela kawngthlang lama khuahkhirhna awm miah lova in sak tamzia an hmu chu lungchhiatthlak an ti hle! Leitan thlen hma lawk kawngthlang lah chu bawlhhlawh paihna (garbage dump) atana hman a lo ni leh nghal tih an hmu bawk. A hmun thengthaw lai ber, a rimchhe lai a han ni ta chu pawi an ti hle a niawm e. Sorkar leh AMC thuneitute hnena an complain-na lehkhate chuan kori a tu lem chuang lo an ti. Tichuan, bei nge sei run dung tiin, tun kum April ni 30 khan Chapter Convener-hovin INTACH member-te chuan AMC Chairman an hmu leh a. Hemi tum hian Councillor 4 lai an lo awm ve bawk a ni awm e. A cheap kai atanga tanin an han sawi leh malh malh a. Chutah Chairman chuan harsatna an neih thu a sawi ta a; pakhatnaah chuan Revenue Department-in 2013 khan Bawngkawna Community Project ram pawna pass neite in sak khapna a hlip ta si a; miin pass a neih miau chuan building permission lo hnial ngawt theih a ni lo. Pahnihnaah chuan, he lai hmuna INTACH rawt, building sak khuahkhirhna dante hi zawm vek dawn chuan building sakin awmzia a nei lo, “In sak theih a ni lo” tihna ang chauh a ni a. Chuvangin, heng lai hmunte hi humhalh tur chuan Pass neitute hi hmun remchang dangah sorkar hian house sites pe thei sela, chu chu a kawng awmchhun a ni, a ti. Tichuan, an intha then ta a ni awm e. Khawpui enkawltu, AMC puipate hian hetiang hmun, mipui vantlangte tana thawklakna hmun, sum senga siamchawp ngai pawh ni lo, Siamtuin min lo duansak (natural heritage site)-te hi kan mamawh ngawih ngawih thil a ni tih an hriat a va tul em! Town Planning kalphung pangngai angin hetiang hmunte hi mipui tana siam ngei a tul a ni tih, thinlung lama hriatna an neih a pawimawh zual. Hetiang hriat nachang nei loten kan khawpui hi min enkawlsak zel dawn a nih chuan, mipui chan chu maian chan ang vel a ni mai! Revenue Department Order an tlawhchhan hian “Bawngkawna Community Project area pawnah chuan building permit pe chur chur rawh u” a tihna a ni hauh lo. AMC hian Aizawl Master Plan – Vision 2030 hi a pumpuhlumin an pawm thlap tawh a, an Building Regulations pawh ADA ta hlui ang chiah tho a ni a. Aizawl Master Plan phei chuan residential building-te hi ram 36 degree aia awih (slope) nasaah chuan sak loh nise a ti a, 36 degree leh 45 degree-a awih ramah chuan chenna in ni lo thil (structure) tul dang chu a venhimna bik nen sak a phal a; 45 degree aia awih ramah chuan in sak phal loh bur tur a ti a ni. Dik tak chuan heng lai hmun pahnih kan sawite hi chu, a khawilai pawh hi 45 degree aia awih vek niin a hriat theih; 90 degree dawn te pawh a ni hial mahna. He kaihhruaina dan ziakna Master Plan hi, AMC chu sawi loh, state sorkar meuh pawhin a pawm vek tawh a ni. INTACH-in khuahkhirhna dan an rawtte mai bakah hian a tul phei chuan a aia khauh zawk pawh an siam belh thei zawk a ni. India Danpui, 74th Constitution Amendment Act, 1992 hnuaiah tuma sawi buai theih loh, helam kawnga thuneihna pumhlum neitu an ni si. Revenue Order eng eng emaw chhuanlama siama tlanchhe thei an ni hauh lo; vantlang hriselna leh thawvenna an ngaih pawimawh phawt chuan, heng hmun kan sawite hi an humhalh thei a ni tih a chiang khawp mai. Aizawl khawpui hmangaihtute tanrual a ngai a nih hi, INTACH Mizoram Chapter thlawp turin i pen chhuak ang u khai! - RinSanga