December 18, 2023: December ni 16, 2023 (inrinni) tlai dar 3 khan Aizawl Municipal Corporation (AMC) chuan Aizawl khawpui chhunga bawlhhlawh paih motor Driver zawng zawng te a kokhawm a, bawlhhlawh paih kawnga hriattur pawimawh hrang hrang te zirtirna a pe. He hunah hian Transport Department leh Traffic Police officer ten zirtirna an pe bawk.

Programme hi Joint Municipal Commissioner, Lalremruata Kullai in a kaihruai a. Laltlanzova Khiangte, Executive Corporator-in thu sawiin, Aizawl khawpui chhunga atang a nitin Bawlhhlawh Tawihthei lo (Dry Waste) - 75.26 Ton leh Bawlhhlawh Tawihthei (Wet Waste) – 32.92 Ton paih thin a nih thu a sawi a. Local Council 85 atangin Garbage Truck (bawlhhlawh phur motor) - 151 hman mek a nih thu leh kum 2023 chhung a vaibelchhe 4.9 (Rs. 4,91,19,342/-) chuang AMC-in a senral a tawh thu te, thla khatah nuai 45 – 58 vel AMC-in a hman thin thu te a sawi bawk a ni.

Municipal Commissioner, Er. Lalhriatpuia pawhin thu sawiin, bawlhhlawh paih motor a bawlhhlawh hi khuh ngei tur a nih thu a sawi a, a khuh lo te chu SWM Bye Laws, 2019 No. 4.3 leh 10 (1)(3) hmangin Rs. 5,000/- chawitir theih a nih thu te, a hmun lova bawlhhlawh paih leh Solid Waste Management Center (SWMC) thlen lova bawlhhlawh phur motor atanga bawlhhlawh thehthang/hralh hi SWM Bye Laws, 2019 No. 4.1 – 4.3 angin Rs. 5,000/- chawitir theih a nih thu te a sawi a; Aizawl khawpui vawn fai kawngah Driver-te nen thawh ho tlan a pawimawh thu a sawi bawk.