US Open khelh mekah hmeichhe Grand Slams singles titles 23 vaw chhuak tawhtu, Serena Williams chuan Ajla Tomljanovic a hneh loh hnuah a tennis khawvel zinkawng chu a chawlhsan dawn ta. 

Tennis history-a hmeichhe Grand Slam lawmman la tam ber dawttu hian a inkhelh zawhah hnuk ulh teuh chungin, entu mipui lamah ban phar chhuakin a ropuina mual chu hrehawm ti takin a chhuah san a ni. 

Kar 319 zet world number ni thei Serena Williams hian an rama khelh thin US Open chu tennis a khelh tawpna tur a nih thu a lo sawi lawk tawh a, tichuan mi pahnih hnehin round thumna a thleng phak a, mahse  Australian Ajla Tomljanovic-i lakah tlawmin a thu lo tiam tawh angin a tennis khawvel chu a mangtha ta a ni. 

Kum 41 mi Williams hian kum 27 chhung teh meuh professional tennis a khel a, hetih chhung hian singles titles 73 zet a chawi hman a, chung zinga 23 te chu khawvel-in a ngaihhlut em em Grand Slams singles titles te an ni. Hard court-ah tum 47 chakin clay court-ah 13 a chak a, grass-ah tum 8 leh carpet chungah tum 5 a champion bawk.

A kum a lo tam ve ta bawk nen Williams hian theih tawp chhuahin bei let mahse 7-5 6-7 (4-7) 6-1 in Ajla Tomljanovic-i lakah hian a tlawm ta tho a ni.

World number one rei tak chhung lo ni tawh Williams hian match points tum 5 zet a hum thei a, mahse a tum rukna chu a hum zo ta thlawt lo a ni.     

Court a chhuahsan dawn lai hiam Arthur Ashe Stadium-a entu mipui zawng zawng deuh thaw chuan ding chungin a lama kut vaiin an thlah liam a ni. 

1999 khan kum 17 mi lek a nihin a Grand slam singles titles hmasaber a vaw chhuak a, tennis a khelh chhungin tum 858 chak tawhin tum 156 chiah a tlawm a, a chakna rate hi 84.6% niin record tha tak a ni. Tennis tournament-a an ngaihsan leh hlut em em Wimbledon singles final tum 11 a lut thei ngat te hian mi bik a nih zia a lan tir chiang hle awm e.

Grand Slams singles 23 bakah hian doubles-ah tum 14 zet a champion bawk a, Mixed doubles trophy tum hnih a chawi tawh bawk. A service chak ber tum record chu 128.6 mph niin prize money bik liau liau atangin dollar maktaduai 95 a hlawh chhuak a, heng bakah hian fakna leh sponsorship atangin dollar maktaduai 300 chuang a lalut bawk.   

Hnuk ulh teuh chunga mipui lama in mangthana ban a vai lai hian Tina Turner-a hlachuam chuai theilo 'Simply The Best' tih hla chu court chhung a awm zawng zawng hriat turin an play ruai ruai bawk a, mipui lamin ding chungin ban vaiin an he tennis star ropui hi an thlah liam ve bawk.

Inkhelh zawha court laia an kawmnaah Williams hian a mittui a dang zo lo va, bianga mittui luang chungin a chhungte, a team te leh entu mipui chungah leh khawvel puma amah tantute zawng zawng chungah lawmthu a sawiin Williams chuan,"Kum rei tak chhung tennis khawvel-a ka cham chhunga mi tan thintu zawng zawng chungah ka lawm tak zet a ni,” a ti. 

1995-a kum 14 mi chauh nia professional tournament khel tawh hian engkim chu a chhungte vanga thleng a nih thu sawiin engkim an phu thu mipui hmaah a sawi langin,”Ka nu leh pa te chungah hian thinlung tak takin ka lawm a ni,” a ti. Sawi zawmin, “Ka u Venus Williams hi awm lo se, kei hi engmah ka ni dawn lo tih ka chiang a, tuna inhmaa ding Serena hi in hre ngai lo bawk ang,. Venus hi Serena Williams ka nih theihna tura ka engkim a engkim a ni,” a ti. 

A hnelh loh tak Tomljanovic-i, world number 46 hian fourth round-ah Russian nula Liudmila Samsonova a hmachhawn ang.