Dawrpui Vengthar Presbyterian Kohhran Gospel Centenary Hall-ah mipui mittui a sur zung zung a, Pu Rintea'n (Albatross frontman) a mittui hruk zauh zauh pahin a thianpa thlahna thu lungkuai zet a sawi a. Chu biak in ah chuan Pu Faktea (ani pawh a liam ta!) rawngbawlna kaltlangin, hun eng emaw ti liam taa Pu Lianhminga nen Pathian pawlna an chan thar thu hnukulh teuhin a sawi a, an inkalsanna hmun a nih thu an han sawi zawm leh meuh chuan insum zo lovin a ngawi vang vang..! Van lam nen anni thiandun an inzawm tharna hmun ngeia, a thianpa chutia vui leh suna a awm chu hriatthiampuiphak rual a ni lo, a na dâwn em mai! 

Nikum 2022 kum tawp lam atang khan remchang hmasa bera tih chhuah turin Mizo rimawi huanga hmingdai ngai tawh lo tur Albatross band chanchin thlurbingin, an biography ka buatsaih a - an band member Pute: P.B.Lianhminga, Hmingpuia, Dave, Msa leh Rintea bakah a kila mi tangkai biru thlengin khawrhchhuahna ka nei a, kan hmathlir leh hmachhawp buaipuia kan hmanhlel viau laiin, nikum September ni 27 (Thawhlehni) zana darkar 3 dâwn lai a mimal nun leh a rimawi khawvel zin kawng mai bakah, infiamna lama a hnuhma chhuanawm tak tak te Mizo pa titi kalphung  ngeia inthlahrung taka loh theih lohna avang chauha phawrhchhuaktu, pa tawng tlem leh inkiltawih tak, Albatross keyboardist Pu Pba ka'n chân ta mai hian min thawng tak zet - he Albatross hi tuipui sava thla sei, khawvel sava zinga thla nei sei ber a ni tih leh a chanchin hre thui lo tân pawh - Mizo Albatross band thla erawh a tliak tih hi chu kan hre vek ang, a lungchhiatthlak teh e! 

Kha mi zan kha ka la hre reng, thli a thaw heuh heuh a, zan tir atangin a reh ruih bawk a, thlasik boruakin Aizawl khawpuiah ro a rel tan a, a vawt lek lek! An kawngkapui ka kik karh karh a, lo inbe lawk tawh kan ni bawk a, inpawh takin ani nen khan dawhkan pakhat kan kil dun a, hawihhawm taka min lo chiauautu a nupui Pi Nunpuii kianga kuhva chu a ban zuk zuk a, a siam a, a khât tawkin a hmawm zauh zauh reng a - a che zia chuan Mafaa min ti hrechhuak uar uar, ze inang tak an ni! Muang tham charhin a titi a - Darjeling lama zirna bul tan, Aizawl Neuhof leh Mt. Carmel school lama chhunzawm a ni. Kum 1990 a pawl 10 a pass khan, top ten kha mark 1 leka pha lo a nihna te khan zirna lama a hriam zia a nemnghet chiang hle awm e. A kut a hnum em a, a khawih apiang kha a dak hlarh zel emaw tih mai tur a ni. Mizo mipa naupangin infiamnaa an tih thin ang chu naupang harhvang tih takah a ti thei pawl a ni deuh zel. In marble thap thlengin a thiam fâl zia Mt. Carmel Principal Pu Nunkunga'n a ruang chunga a sawi tak kha mawle. High school a zo a, Mizoram Junior Volleyball team-ah telin, Nagaon, Asaam-ah te kalin, tum eng emaw zat an College, Aizawl West Volleyball team-ah telin Tura, Meghalaya thlengin an fehchhuak a. All India Forest Meet-ah Mizoram Forest Dept. aiawhin Hyderabad te zuk thleng hial khawpin theihna thahrui leh tharum nei mihring a ni. CYMA YMA Volleyball tournament-ah an veng, Dawrpui Vengthar Br. YMA pawh Runner Up nih puiin, tumkhat phei chu an champion zui hial nghe nghe. Chutiang thu te chu pa uangthuang lo tih takah tlawm raihin a sawi a, thu a khuh viau zel. Social media lama Mizo mipa tam tak ri buan buan, dengkhawng leh diriamna râwl chhuah kuk kuk thinte nen an zia chu inpersan tak a ni - champion team leh 1st. round-a straight set a chak lo team te inkar ang vêl a ni hial ta ve ang! 

Pu Pba leh Zofate rimawi khawvel chu tarlan zui kher ngai lo khawpin a kuthnu mam zia hre vektu kan ni awm e. Sawi hmaih theih loh leh thiang lo pakhat han tarlang leh ila. Rimawi khawvela thuk leh thui tak a inhman hnu khan, an kohhranah Pu Faktea'n tarlan tak ang khian rawngbawlna a nei a. Mipui tam takin tan dar a rik hma atangin biak in ah fakna hla sa in, zai leh lamin Pathian an fak a, thutna chan te chu har tak a ni. Chutiang chep tak karah chuan, Pu Pba nupui hian an pa thutna tur a lo hauhin a lo buaipui nasa thin - kal hmasa zawk awm a tul miau si a le!

Nui kur kura a certificate leh a medal dawn zawng zawng deuhthaw a bo dân a sawi te, rimawi khawvel a luhchilh chhoh dân chhehvel leh Zofate tâna a rualawhna te chu la chhawp chhuak turah inngai ila, amah berin a tawnhriat ngaihnawm tak tak a chhiar hman ta lo tur erawh hi ka va'n ui, amah tak kha a sin ka ui chu aw!