ZALEN, Mar. 14, 2025: Musician hriat hlawh, Victor the Scavenger chuan cancer natna vei mek, Mizo Idol star Alex Lalchhuankima piancham puala L8nite Jam a neihah mipuiin a damlo kan nan Rs 57,800 an thawhkhawm.

Zonet TV buatsaih Mizo Idol season hmasa ber, kum 2007-a neih atanga a aw pa tak nena mi hriat hlawh tan, Alex-a hi hun rei tak cancer natnain a tibuai tawh a, enkawl mek zel a la ni.

A piancham pual hian Scavenger Project guitarist Victor-a hi jam-in thlirtu leh ngaithlatute atanga Alex-a kanna tur thawh theihin a hawng a, mi tam takin Mizo Idol star hi an kan a ni.

Lemchang thiam ni bawk, Alex-a kan nana sum thawhkhawmte hi Ningani zan khan ama hnenah hlan nghal a ni.

Youth Icon 2024 judge Victor-a chuan damlo kantute chungah lawm thu a sawi a. Alex-a nupui, zai thiam ve bawk, Gracey pawhin a social media account atangin lawm thu a sawi bawk.