ZALEN, May 10, 2026: Yonex-Sunrise All India Junior Ranking Badminton Tournament 2026 ah Sainunmawia Sailo chu a tanpui, Rishita Pandey nen mixed doubles-ah silver medal an.

Bangalorem Karnataka-a Pathianni kal ta atanga khelh tan, Pathiannia khelh zawh tak inelna hi Mawia leh Pandey-i hian unseeded ni chungin tournament an hmachhawn a. Round of 32-ah Lakshya Mudgal leh Arshita te inkawp chu 21-17, 21-14-in an hneh.

Round of 16-ah Mangsuan Vemei Kyoveio leh Lalrinhlui Hmar te tangdun lakah 22-20, 21-15-a hnehna chang lehin quarterfinal an lut.

A thiam pariat inelnaah hian Seeded No 7 Arnav Sharma leh Bhavishya Changmai te tangdun hmachhawn zuiin game hloh lovin 21-17, 21-12-a hneh lehin a thiam pali zingah an invaw kai.

Semi final-ah hian Mohammad Ali Mir leh Shambavi Rauthan te inkawp hmachhawn letin game hmasa pahnih inlak chhawkin deciding games-ah a ding chang zawkah tanginh 21-19, 14-21, 21-14-a hnehin final an lut.

Final pawh semifinal ang thovin an tumpuite nen an inhnehtawk hle a. Punith S. leh Deepak Raj Aditi te tang dun lakah hian game la hmasa zawkah an tang a; mahse, game hnuhnung pahnih an hloh zawn tak avangin 17-21, 21-16, 21-17-in a tlawm zawkah an tang a, silver medal an la ta a ni.

Ramhlun Venglai, Aizawl rawlthar, Mawia tan tun hi national junior level tournament-a a medal lak vawi hnihna a ni a. Sub-Junior level-ah pawh medal a lo vaw chhuak nual tawh bawk.

Tun dinhmunah U-19 Mixed doubles category bikah All India Ranking 12-na a ni phak a, boy’s doubles-ah ranking 18-na a ni tel bawk a. Bangalore-a inelna result hian a dinhmun a tihsan phah sawt dawn a ni. 

Mawia te thian dun hian silver medal an lak phak avang hian kumin kum tawp lama Japan-a khelh tur, Badminton Asia Junior Championship khel thei tur zawnna, selection trial-a inlan phak thei turin an invaw tling nghal bawk. 

Mizoram Badminton Association (MBA) chuan Mizoram tihmingthatu Mawia hi a chhuangin a lawmpui tak zet a. Tournament a hmachhawn leh zel turah hlawhtlinna lian zawk leh sang zawk a hlawhchhuah zel theih nan duhsakna a hlan nghal.