Aizawl July 22, 2024 : Parliament Monsoon session vawiin a neih tan tur inbuatsaihna All Parliamentary Leader meeting nimina neih ah Mizoram MP pahnih ten Mizoram tana mamawh leh an duh te an thlen.

Lok Sabha MP Richard Vanlalhmangaiha chuan North East State te tana NLCPR 10% reserved thin ang hian Corporate Social Responsibilty (CSR) Fund hi North East tan 10% reserved a nih theih nan tun Budget session-ah hian sawiho tura chhawpchhuah ni se a duh thu a sawi chhuak a ni.

Rajya Sabha MP K.Vanlalvena chuan Remal Cyclone in May ni 28, 2024-a Mizoram a nuai avanga Aizawl khawpuia mi 30 thihna leh chhungkaw 40 chuang chenna in hloh an awm thu te, Quarry chim avanga mi 14 thihna te, July ni 2-a leimin avanga mi 3 thihna te bakah Monsoon ruah nasa avanga Mizoram hmun hrang hranga leimin in motor kawng a tih chhiat te, tui lianin leilet leh thlai a tih chhiat nasat thu te au chhuah pui a, Disaster Management & Rehabilitation (DM&R) Mizoram tana fund pek belh a tul thu a sawi bawk a ni.

All Parliamentary Leader Meeting hi Union Minister of Parliamentary Affairs Kiren Rijiju an a kaihruai a. Union Minister of Defence Rajnat Singh leh Leader of Rajya Sabha JP Nanda ten an tel pui bawk a ni.