ZALEN September 22, 2026 : United Forum of Bank Unions (UFBU) leh All India Regional Rural Bank Employees Association (AIRRBEA) ten September ni 28 atanga ni 30, 2026 chhunga ram pum huapa ni thum chhung bank strike neih an tum avangin Mizoram Rural Bank (MRB) chuan customer-te lo inhmakhua tura ngenna leh hriattirna an chhuah.

Strike hun chhung hian Mizoram Rural Bank chuan essential banking service-te pe chhuak turin theihtawp an chhuah dawn tho a; chutih rual erawh chuan branch dawr ngai pawimawh nei ten strike thlen hmaa lo inhmakhua ngei turin an chah a ni. 

A bik takin pawisa lak chhuah nan ATM leh Customer Service Point (CSP)-te hman tangkai bakah, Internet Banking, Mobile Banking, UPI leh digital channel hrang hrangte hmang hram hram tura ngen an ni bawk.

MRB thuchhuah chuan strike avanga customer-te tana harsatna lo thleng thei zawng zawngah a pawi an tih thu sawiin, mipuite hriatthiamna leh thawhpuina an ngen a ni.

Mizoram Cooperative Apex Bank Ltd. pawhin he bank strike hi an zawm dawn tih sawiin, an bank dawrtute'n harsatna an tawh lohna'n bank/branch dawr ngaihna tur an neih ang angte lo inhmakhua turin an ngen bawk.