DOWNLOAD OUR APP

Read latest news on your phone
app-store

Amah thlawptute chetnaah Bolsonaro chhui tel dawn

Jan 15, 2023

Brazil-a Supreme Court chuan an ram president hlui, right-wing hruaitu, Jair Bolsonaro chu Brasília-a sorkar hmun pawimawh tak tak luhchilhna thlenga chhui tur zingah a telh.

Buaina chhuah hnua sorkar chetna leh hmalakna

Pathiannia Bolsonaro thlawptuten an ram sorkar hmun pawimawh tak tak an luhchilh hnuah khan sumdawng leh sorkar mi pawimawh tak tak chhui zui an ni a, an zingah hian Brasilia-a security head thin, buaina chhuah hma lawka US pan ta, Anderson Torres pawh a tel.

Ningani khan police chuan a chenna in tlawhin inthlan result tihdanglam tumna kaihhnawih lehkha eng emaw zat an hai chhuak niin an insawi.

Torres-a chuan heng lehkhaah hian engmah inhnamhnawihna a nei lo tih sawi mah se Justice Minister Flavio Dino chuan Thawhtannia inlan turin a ti a, a nih loh chuan hruai haw luih a nih tur thu a sawi.

A hmain Lula chuan Bolsonaro thawhpuituten presidential palace bei turin ruahmanna an siam niin a lo sawi tawh.

Congress luhchilhna kaihhnawihah hian mi 1,200 chuang hman tawh niin tam tak thubuai siamsak an ni.

Thuneitu sang eng emaw zat chu he thil thleng dan tum lo leh a thlen laia engmah an tih loh avangin mawhphurtua puhin manna tur thupek chhuah a ni tawh.

Brazil-a Supreme Court chuan an ram president hlui, right-wing hruaitu, Jair Bolsonaro chu Brasília-a sorkar hmun pawimawh tak tak luhchilhna thlenga chhui tur zingah a telh.

Tun hi January 8-a thil thleng chungchanga Bolsonaro-a hi a mawhphurtu zinga a lan vawi khatna a ni.

Hemi hma lawk hian Bolsonaro hian October thlaa president thlan chu dan angin a felfai tawk lo tih video a post a ni.

Prosecutor-te chuan Bolsonaro hian hetiang thil a sawi hi thubuai a tling tih an sawi.

Zirtawpni khan Supreme Court hnenah president hlui chu chhui tur zinga telh ve turin an ngen a ni.

Bolsonaro-a’n video a post-ah hian President Luiz Inácio Lula da Silva chu a pisa luah tura thlan tlin tak tak a ni lo va, Supreme Court leh an ram inthlan thuneituten an thlan mai zawk a nih thu a sawi.

Prosecutor general (PGR) pisa chuan he thil chungchangah hian ‘Bolsonaro hian vantlangah pawikhawihna a tivang a ni’ tiin thu an chhuah.

Video hi Pathiannia mipui chet vakna a thlen hnu lawka post niin paih (delete) leh thuai a ni a, prosecutor general pisa chuan hei hi Bolsonaro chhuina turin a tling tawk tih a sawi.

Supreme Court Judge Alexandre de Moraes chuan Bolsonaro-a hi PGR-in ‘inhawr khawmna lian tak thlentu leh ti tura ruahmanna siamtu’ a ni tih a lantir niin a sawi.

“Vantlang hruaitu, dawihzep taka mipui rorelna sawinghin tumte hian pawm theih loh thil hi an la ti fo zel dawn a ni,” tiin Justice de Moraes chuan a sawi.

Bolsonaro thlawptute hian October-a inthlan kha tihchingpena puhin an ram Supreme Court, Congress leh presidential palace te chu Pathianni khan an luhchilh.

Brasilia khawpui leh a chhehvelah chawlhkar eng emaw zat inkulh tawhin sipaite inrawlha sorkar paih thla turin an phut.

Hetih lai hian Bolsonaro hi Florida-a damdawi inah a pum a nawm loh avangin dah a ni tih a nupuiin a sawi.

President thar, Lula hnena thuneihna a hlan fel hma lawk, December thla tawpah Brazil chhuahsanin United States a pan a ni.

Torres: Haw nge hruai haw luih?

Brazilian thuneitute chuan justice minister hlui, Bolsonaro thawhpui chu Thawhtannia an rama kir lo a nih chuan US atanga an hruai haw tur thu an sawi.

Supreme Court chuan Torres-a hi Pathiannia Brasilia-a sorkar hmun pawimawhte luhchilhnaa a inhnamhnawih bakah inthlan result tidanglam tura hmalatu zingah a tel niin an puh.

Torres-a hian engmah tih dik loh a neih loh thu leh a hunah a inlan tur thu a sawi a, tunah hian Bolsonaro nen US-a Florida-ah an la awm mek.

President Lula chuan mipui chetnaa suma puitu leh ruahmanna siamtu zawng zawng chu an chhui chhuah dawn thu a sawi a.  Justice minister pawhin Torres-a chu a tul chuan an hruai haw tur thu a sawi.

Share now