ZALEN June 13, 2024; Vawiin khan ni hnih (2) awh tur AMC Board of Corporators (BoC) Meeting chu neih tan a ni. BoC meeting hi Lalrinenga Sailo, Aizawl Mayor-in a kaihruai a, Corporators ten Aizawl khawpui hmasawnna tura ruahmanna hrang hrang an sawiho.

BoC meeting-ah hian Aizawl khawpui a ruahmanna (planning) mumal zawk a awm theih nana Aizawl Development Committee (ADC) din chungchang te, Parking chungchanga Local Council thuneihna pek theihna dan tur Parking Regulations Amendment chungchang leh 2024-2025 atana AMC Budget te sawiho a ni ang.

Vawiina BoC meeting ni khatnaah hian Lalringliana, Executive Corporator (Cash & Accounts) in AMC Budget Estimate 2024-2025 a pharh a, ni hnihna (naktuk) ah sawi ho a ni ang.

AMC Budget 2024-2025 pharh tak hi a pumpuiin Rs. Vbc. 110.16 a ni a, chung zinga Rs. Vbc. 11.01chu AMC thawhchhuah (Own Source of Revenue) tur niin, a dang zawng chu Central leh State Sawrkar atanga dawn tura beisei a ni.

Own Source of Revenue zinga Rs. Vbc. 6.2 crore hi Property Tax atanga hmuh beisei niin a dang te chu CSTT, CCBT leh AMC Building hrang hrang luahman (rent), Parking Fee, Hoarding Feen etc. atanga hmuh tura beisei a ni.

AMC sum dawn leh thawh chhuah chu la beitham deuh mahse sum-chang-thei (Revenue Generating Assets) engemawzat din a nih tawh thu tarlan a ni a, chung zingah chuan – AMC Multi-Complex, Tuikual South; AMC Plaza, Bawngkawn; AMC Sports Complex, Bawngkawn; AMC Ecopark – Zonuam leh Ailawng te tarlan a ni.

Kum 2024-2025 chhunga 15th Finance Commission grant AMC-in dawn a beisei zat Rs. Vbc. 39 atanga Rs. Vbc. 9.23 chu Lunglei Municipal Council tan dah hran (set aside) a ngaih thu tarlan a ni a. Chutih laiin AMC sum thawhchhuah (Own Source Revenue) a pung zawnga a kal thei chu lawmawm an tih thu tarlan a ni. Solid Waste Management Center, Tuirial pual bik atana Rs. Nuai 492.57 State Sawrkar atanga dawn a ni tur chu lawmawm an tih thu tarlan a ni bawk.

Budget Estimate atangin AMC inrelbawlna atan 19.10% hman tura ruahman a ni a, a bak zawng 80.90% chu mipuite hamthatna atana hman tura ruahman a ni. Hetiang hi a nih avang hian AMC Budget hi ‘Budget tha tak tih loh rual a ni lo’ tiin Lalringliana, Executive Corporator chuan a sawi a, AMC thawktu zawng zawng te inpekna leh thawhhona tha tak avanga AMC in hma a sawn zel thu Lalringliana chuan a sawi bawk.

AMC inrelbawl nana sum hmanna tur tlangpui tarlan zingah, Budget atanga 11.01 % chu Elected Corporators te lawmman leh thawktute hlawh kaihhnawih atana hman tur a dah a ni a. Local Council lawmman leh office inrelbawlna hrang hrang atan Budget atanga 8.09% dah a ni a ni bawk.

Mipui kaihhnawih leh development works hrang hrang thawh tur zingah Bawlhhlawh lakkhawm leh sawngbawl nan Budget atanga 23.34% lai hman a ni dawn a. Tui leh a kaihhnawih ah 20.80%, Development Works atan 22.10%, Local Council te hnena vengchhung hmasawnna atana pek chhuah tur 5.02%, Ward Development Fund atan 6.64% te chu a langsar zual te a ni.

Lalringliana chuan India ram inthlanpui avang leh chhan hrang hrang avangin Budget Estimate 2024-2025 hi a hun taka pharh theih a nih loh tur a sawi a ni.

Aizawl khawpui chhunga parking area tura Pu R. Thanglura, Deputy Mayor-in a chhawp chhuah chu vawiin a BoC meeting chuan a pawm bawk.

BoC meeting ah hian John Zosangliana Ralte, Ward VI Corporator, ni 21 March 2024 a New Delhi a boral ta sunna hun hman a ni a. Hon’ble Aizawl Mayor-in a chanchin tlangpui a sawi hnu-in John Zosangliana Ralte sun nan minute khat chhung ngawi renga dingin hun hman a ni.

Vawiina BoC meeting-ah hian AMC Elected Corporators tanglaite an tel kim.