Aizawl : MIMA Executive meeting chuan, AMC Licensing Regulations, 2012 chu ngun taka an zirchian leh an enho hnuah Mizo Hnam himna tura siam that pakhatmah a la awm lo, an ti. 

Licensing Regulations, 2012 in a phut thin chu, tun dinhmunah pawh Epic, Residential Certificate, building neitu phalna, passport size photo 4copies leh Local Council atanga NOC an phut hi a hma lama mi nen a ngai reng. Heng documents te hi Hnamdang tan neih harsa pakhat mah a awm lo a ni. Epic leh Residential Certificate te hi Mizoram tih a ni si lova, India rama State dang khawi hmun pawh a hman theih vek a ni, an ti.
MIMA chuan COVID-19 hri len hmaa MIMA in a check naah pawh hnam dang tam tak AMC ah hian an in register tawh a ni tih a hmu chhuak a ni. Hetiang anih avang hian AMC a sumdawngte in register chungchangah hian MIMA chu a dinna ngaiah a la ding reng a, Sumdawngte AMC ah hian Registration tih rih loh tur a ni, an ti. 

Mizo hnam himna turin AMC pawhin Registration ti tur hian sumdawngte mi tilui lo turin MIMA chuan a ngen nghal bawk a, tih luih tir tumna a awm anih chuan MIMA hotute hriattir vat ni se an ti.

Mizo hnam himna a awm loh lai hian Bank thenkhata loan lak dawn leh department thenkhat thil pawimawh tih dawnin AMC Registration certificate phut an la awm tih hriat a ni a. Hengho pawh hian phut tawh lo turin MIMA chuan a ngen, an ti a, phut lui an awm chuan Chanchinbua an hming chhuah anih tur thu leh MIMA chuan a theih angin hma an lak tur thu an sawi bawk a ni