September 26, 2022; Aizawl Municipal Corporation (AMC) chuan phalna nei lo leh approved drawing ang lova in sa te hremna (penalty/fine) chawi tur thupek chhuahin, hun hmasa lam nen khaikhinin hremna a na/sang dawn hle.

Municipal Commissioner, AMC in tunhnai khan thupek tichhuakin, phalna nei lo leh approved drawing ang lova in sa te chu 'The Mizoram Municipality Acts, 2007 (As amended in 2015) Section 130 & 374 tlawhchhanin, hremna (penalty/fine) an chawi zat tur a tarlang a, hremna dan thar chu September 2022 atangin hman tan a ni.

Dan lo a in sa te chawi tur zat tarlan a nih danin, permanent building ah upto Rs. 1000 per sq. m a ni ang a, semi permanent ah upto Rs. 500 per sq. m leh ordinary buildig ah upto Rs. 200 per sq. m a ni ang.

AMC a Enforcement Committee hruaitute chuan, in sak phalna pek leh in sak danah AMC, engineer, local council leh mipuiin an tih tur an ti tawk lo tlang niin a lang tih tunhnai khan thuthar thehdarhtute kawmin an lo sawi tawh a, Aizawl nuam zawk siam a nih theih nan AMC dan leh thupekte ngai pawimawha zawm turin mipuite an ngen bawk.