June 2, 2023; Aizawl Municipal Corporation (AMC) Board of Councillors Meeting vawiin a thukhawm chuan Health Department, Govt. of Mizoram in Dengue hrileng lo pung zel tur do pui tura AMC a ngen angin Dengue do hmalakna atan, AMC huam chhunga veng hrang hrangten an hman theih turin Fogging Machine lei turin a pawm.

 BOC meeting hi Aizawl Mayor Pu Lalrinenga Sailo in kaihruaiin AMC budget 2023-24 pharh a ni a. AMC hmalakna hrang hrang report ngaihthlak a nih bakah Corporator pahnih, Pu Rosiamngheta, Ward III Corporator leh Pu Lalfakzuala Chenkual, Ward XIII Corporator te motion putluh te uluk taka sawi ho a ni hnuah pawm a ni bawk. 

BOC Meeting chuan Aizawl khawpui chhunga Restaurant, Hotel leh Hostel te chu AMC Licensing Regulation 2012 hnuaia register an nih ang in he regulation dan hnuaiah hian an thianghlim dan leh inenkawlna felfai dan te endik thin ni rawh se, tiin a pawm a.

BOC meeting hian AMC in a hman mek leilaih khuahkhirhna dan ‘AMC Site Development and Slope Modification Regulations, 2007’ hi tun aia mipuite tana awlsam leh zangkhai zawk a kalpui/ hman a nih theih nan hmalak a remti bawk a ni. 

Pu Lalringliana, Executive Councillor, Cash &  Accounts changtuin AMC Budget 2023-24 sawifiahin a pharh a. AMC Budget 2023-24 hi ni 5.6.2023 (Thawhtanni) ah sawiho leh tur a ni a. Budget a pharh hnuah meeting hi vawiin atan tihtawp lailawk a ni.