ZALEN August 27, 2023: Aizawl Municipal Corporation (AMC) chuan hriattirna (notification) tichhuakin ran talh leh sa ser thin te chu thla thar (ni 01.09.2023) atang chuan ran talhna hmun (slaughter house) Mualpui leh Bawngkawn ah chauh ran talh thin tawh turin a ti.

He hriattirna hi August ni 17,2023 khan tihchhuah a niin he hriattirna hi bawng leh vawk talh te a huam dawn a, Ar talh erawh a huam dawn lo niin AMC thawktute chuan ZALEN an hrilh a. Dan zawm lo te chu The Mizoram Municipalities Act 2007 hmangin hrem an ni dawn niin a tarlang bawk.

Hetih lai hian ran talh thin thenkhat chuan AMC ruahmanna chu an tan a buaithlak thei hle dawn niin an sawi a. "Aizawl hmar, chhuahlam leh chhim lam tan chuan a buaithlak vak lo mai thei a. Keini tlak lam tan chuan vawk pakhat talh tura pan zel dawn chuan kan phurhna senso leh kan hun hman tur nen a buaithlak khawpin ka ring," tiin ZALEN a hrilh.