ZALEN June 29, 2024; Vawiin khan Bawngkawn, Durtlang Road-a leimin avangin Bawngkawn - Durtlang Road khar a ni.

Aizawl Municipal Corporation (AMC) thuchhuah tarlan danin, harsatna thlenna hmun hi zing dar 9 khan Deputy Commissioner & District Disaster Management Authority, Aizawl kaihhruainain AMC, G&M, PWD leh Department hrang hrang atanga mithiam ten Joint Inspection an nei a ni. Inspection neih lai hian lei tla leh mai thei a la awm avangin chhiatna thleng palh a awm loh nan kawng block nghal a ni.

Joint Inspection Team, a hmuna tlawhtute hian a hmun laitu Lalhruaisanga, Chawntlangpui, Lawngtlai District chu rang taka leimin chhunzawm thei laite tifai nghal turin an hriattir a. Hna a thawh zawh veleh Aizawl DC/DDMA hnuaia Quick Response Team te kaihhruainain a hmunhma hi tha takin khuh nghal tura ruahmanna siam a ni a; Kawng kal tan a him tih a chian hnuah chauh kawng hi hawn ni se tih a ni bawk.

Leiminna hmunah hian lei laih phalna (SD&SM Permit) hi AMC chuan a pe lo a; kum khat chuang kaltaah khan leiminna chhak deuhah hian Lalhruaisanga hi uluk taka leilaih dan tur khuahkhirhna (condition) siamsakin lei laih phalna permit pek a ni a; mahse permit ang thlap hian vawiin thlengin hma a la lova, a permit hi a thi tawh nghe nghe a ni.