Aizawl Municipal Council chuan AMC Licensing Regulations 2012 chu tlawmngai pawlte leh sumdawng pawlten siamtha tura an ngen chungin siamtha lovin he dan hnuaiah July 2014 chhung ngeia dawrkai/sumdawng te chu in ziaklut turin a ti a, huntiam chhunga in ziaklut (register) lo te chu an dawr kharsak thlenga hremna lek a tum ta hial mai a. AMC thuchhuak hi duh lovin tlawmngai pawl hrang hrang intelkhawm te chuan he dan sut anih ngei theihnan July 22,2014 atangin AMC pisa kai turte dan an tum a, sumdawng pawl intelkhawm Mizoram Merchant Association (MIMA) pawhin July 17,2014 (Ningani) hian Aizawl khawpui chhunga dawr zawng zawng khar an tum bawk a. Tlawmngai pawlte leh sumdawng pawl te hian he dan hnuaia inziaklut turte tan 'Tribal Certificate' an phut a, hei hi Mizoram leh hnam a himna atan an ti a ni. Tlawmngai pawlte leh sumdawngte thilphut hi Mizote thlirna atang chuan tihawm tak a niin Mizo te himna tur ni ngeiin a lang a, mahse AMC lamin a ti hlawhtling duh tlat lo(?) hi enge a chhan ni ber ang? AMC hi India Constitution hnuaia roreltu tura mipuite thlan a ni a, an ni thlirna atang chuan Mizo leh Mizo lo, Tribal leh Tribal lo a awm thei lo a, India khua leh tui tawh phawt chu dan anga an en vek a ngai niin a lang. Tuna NGO leh sumdawng pawlte duhdan ang hian AMC Licensing Regulation 2012 hi siamtha ta se emaw ti danglam ta se miin Law Court ah an khin chuan AMC hian thiamloh a chang ngeiin a rinawm a, hei hi hmulawkin an ti duhlo niin a ngaih theih a. Tuna mi hmang hian Mizo mipuite tana him tak leh hlauhawm lovin a kalpui theih niin an sawi ve thung a ni. Engpawh nise AMC thuneitute leh thawktute hian Mizoram mipuite himna chu an ngai pawimawh em em ang tih a rinawm a, tuna thu inchuh lai hi siamtha in kawng dang hmanga Mizo mipuite himna tur, India danpui hnuaiah ngei ngaihtuah thiam se thil lawmawm tak a ni ang. Tlawmngai pawlte leh sumdawngte hmachhawp anga dawr khar leh pisa kai tur te dan an nih chuan a tuartu ber tur chu miretheite an ni dawn a, chuvangin uluk taka ngaihtuah chunga a lehlam ve ve te pawh inhnukhniam zawnga tan an lak a ngai a ni. Sawrkar pawh kut kuangkuaha thlir mai mai lovin tun ang hunah chuan 'aw' chhuah a, harsatna chingfel tura hma a lak a tul ta a ni.