Aizawl August 26, 2024 : Aizawl Municipal Corporation Ward VI By-Election August 22, 2024-a neih zawh takah ZPM Candidate H. Lalremtluanga leh MNF leh Congress thlawp Independent candidate Lalrinfeli te chuan Polling Station 10 awmah Polling Station panga-ah hnehna an chang ve ve, a pumpuiah ZPM candidate hian vote 81-in hnehna a chang. Vote tla zawng zawng 4691 atangin 2354 hmu in ZPM Candidate H. Lalremtluanga chu tling a puan a ni. Returning Officer Mark Lalthanliana chuan winning candidate hnenah hian Certificate of Election a hlan a ni.

Vote tamna ber Chanmari West-ah hian polling station 5 a awm a, heng zingah hian H. Lalremruata hian polling station pahnih-ah hnehna an chang a, a dang zawngah party pahnih candidate intawmin hnehna a chang. Chanmari West bikah hian Polling Station I -ah vote hi a inthlau a, an inthlauhna hi vote 244 a ni a, hei aia vote inthlauh tamna chu Chanmari West III station niin hetah hian vote 112 in Independent candidate hi a chak a, Vote 56-in Chanmari West IV-ah a chak bawk.

Polling Station 10-ah hian station pathum bak hi chu vote 50 aia tama inthlauhna a awm lo a, vote khata inthlauhna te pawh a awm a, PS pathum bakah hi chuan an inbeitawk hle. Vote thi a awm lo a, vote hi 4671 a tla a, ZPM lam hian vote 2354 a hmu a, Independent candidate hian vote 2273 a hmu a, BJP candidate chuan vote 33 neiin, Nota-ah vote 31 a tla.