ZALEN, August 24, 2025: Mahindra & Mahindra chuan electric car an siam chhuah, BE 6 chi danglam, mi tlem tê chauhin an lei theih turin Batman Edition an tichhuak a. A tirah 300 chauh tura an ruahman chu duhtu an tam deuh avangin 999 an siam phah a, second 135 chhungin a zo vek.

August 14 khan BE 6 Batman Edition hi mipui hmuh theihin an pho chhuak a, an beisei aiin he electric SUV hian hlut a hlawh bakah nei ve duh an awm tak nual avangin hralh chhuah zat tura an bituk pawh a let hnih aia tamin an tihphun phah.

Inrinni khan hauh lawk theih hun an hawng a, second 135 chhungin an inchuh zo nghal vek a. Rs nuai 27.79 (ex-showroom price) a ni a, 79 kWh battery pack hmangin Automotive Research Association of India (ARAI) chuan vawi khat charge full-ah km 682 tlan thei tiin a pawmpui a ni.

A chak zawng 286 hp leh 380 Nm of torque a ni a, a ke hlai zawng inchi 19 a nih rualin duh chuan inchi 20 hman theih tura duan fel sa a ni bawk. a A hma lam kawngkhar leh hnung hawn theihna laiah superhero Batman logo dah a nih bakah hmun hrang hrangah an dah bawk.

July, 2025 chhungin Mahindra-in BE 6 pangngai 1,546 an hralh a, kum hmasa, July, 2024 nena khaikhinin 22.19%-in an hralh zat a pung a. Tun thlaah Batman Edition vangin an hralh a pung leh zual ngei dawn a ni.

Mizorama Mahindra full range dealer Mana Motors chuan electric car chi hrang pahnih, BE 6 leh XEV 9E an chah lut mek a, Mizorama hralh chhuah turin tun thla chhunga tlangzarh theih an inbeisei a, a pianhmang hmu ve duh hrim hrim leh belchiang duh tan an inhawng hle a ni.