Mizo Idol 2018 atanga mipuiten kan hmel hriat, ‘Mizo James Blunt’ an tih mai thin, aw dangdai tak nei, nalh em em a mipuite min awi thintu, Andrew K. Lalchhandama chuan a music video pahnihna atan 'Beiseina Eng' tih chu a ti chhuak dawn ta. 

Andrew K.Lalchhandama hian a music video hmasa ber ‘Zalenna Dar’ chu a lo tichhuak tawh a, he hla hmang hian Thazual Award leh Lelte Award-ahte nominee-ah a lang pha nghe nghe a ni. 

Tun tuma a music video thar ‘Beiseina Eng’ hi Manase H. Saphmingthanga phuah niin, Leprosy Mission Choir pawhin nalh tak a an lo sak tawh kha a ni. Andrew-a ve thung hi chuan a version dang hlak ‘cool’ nalh em em, ngaihthlak veng veng chiin a rawn sa ve thung dawn a ni. 

Music nalh taka siamtu hi Tetea Forte a ni a, recording hi Asafa Recording a ni thung - video hi Albert Video Production kutchhuak a ni bawk. 

A music video chungchang sawiin, “Zirna avangin hun rei tak hla ka tichhuak thei lo a, Pathian zarah liau liau hla thar ka tichhuak ve leh thei tur hi ka lawm hle a ni. He hla a lo puitlin theih nana tha leh sum thawhtute - Achhani Innovatives, Emy T, leh Angaihi chungah lawmthu ka sawi takzet a ni,” a ti. 

Andrew-a hi Mizo Idol judge te pawhin Lengzem hla sa zawk tur a an duh thu an sawi hnu pawh a, Pathian fakna hla sak thlang  tlattu a nihnate Pathianin malsawm a sawm a, programmee hrang hrangah zaia sawmtu a haichham lo hle a, Central KTP 
programmee-ah pawh Pathian rawngbawlin a chhuak thin bawk.