Aizawl December 12, 2022 : PC Party Sr. Vice President Lalrinzuala Chawngthu chuan vawiin khan PC Party Office, Treasury Square-ah neih inang inkawp thin te tana In sak tuma sawrkar hmalakna an dodal thu a puang.

Rinzuala chuan, ''Tun hnaia LGBTQI (Lesbian Gay Bi Sexual Transgender queer Intersex) te tana Sakawrtuichhun rama shelter sak tum hi kan pawm thei lo. Pianpuite chu kan sawi phak awm lo mah se, nikhaw hriat hnua nikhua lo tam tak, mipuiin kan ngaihmawh em em laiin a vulh lenna kawng niah kan ngai a, Mizorama buaipui tham ni lo kha buaipui thamah kan chhuah phah thuai dawn," a ti.

PC Party Sr. Vice President chuan, ''Kan Kristian sakhaw innghahna Bible hi kan ram leh hnam lungphum a ni tur a ni a, chu chauh chu kan dinkhawchhuahna tur a ni bawk. Kan Bible zirtirna leh neih inang inkawp hi Kohhran duh loh leh Kristianna nena inmil lo a nih avangin Mizoram sawrkar hian he hma lakna hi sût leh vat rawh se. Sawrkar laipui atanga shelter sa tura hriattirna copy Mizoram sawrkarin hmuh theih tura a pho lang a nih loh chuan social media-a sawifiahna ringawt kan pawm lo bawk," tiin, "Keini PC Party chuan thuvawn nghet tak- Kan ram, kan hnam leh kan sakhua a him tur a ni, tih hi nghet taka vawngin kan theih leh phak tawkin hma kan la zel dawn," a ti bawk.