Aizawl; Legal Metrology department chuan nikum April thla atanga kumin 2014 January inkar chhung khan LPG/Tanker driver 52 an hrem tawh a, heng mite hi oil pawlhdal leh gas buk tlinglo phurte an ni. Legal Metrology deparment hian nikum April thla atanga kumin January thla inkar hian gas phur tuck 635 an enfiah tawh a, heng an enfiah zingah hian gas (LPG) buk tlinglo 281 an man a, oil phurtu Tanker pawh tum 313 endikin heng bakah hian cement, bukna enfiah leh thildang engemaw zat an thawk bawk a ni. Legal Metrology department a Joint Controller Thangtinliana Pachuau chuan mi thenkhat ten Mizoram Oil thalo bik leh pawlhdal nasa bik anga an sawi chu a dik tawklo tih ZALEN palai a hrilh a. "Oil lo thleng hi kan endik hnuah chauh kan unload tir thin a, dan in hmantlak a tih leh phalchin 0.003 a pelh loh chuan kan unload tir a. Motor khu nasa lutuk thin pawh hi diesel lam vang ni lovin oil filter leh thildang felloh vang a ni fo zawk a ni," a ti. LPG (gas) buk tlinglo chu dan ang tak chuan company lamah thawnlet tur anih laiin thawnlet lovin an tiral mai thin tih a sawi bawk a, "Tunhma in kan thawnlet thin a, mahse agent ten company lamah a man an hmulet theilo fo mai a. Kan mamawhna a sang bawk nen a tlinlohna hisapin a man kan chhiar a, kan tiral mai thin a ni," a ti bawk. Legal Metrology department hian kum 2011-2012 chhungin gas, water meter, tankers, cement etc. endik hna tum 33346 thawkin hemi atang hian Rs.10,62,907 an hmu a. 2012-2013 chhung khan endik hna tum 17164 thawkin Rs. 7,59,425 an hmu a. Nikum 2013 April atanga kumin January 2014 thla tawp thleng khan an chawitir atangin Rs. 7,34,176 an hmu tawh a ni.