Aizawl: Aizawl: Thla liam ta April thla chhung khan Mizoram chhung leh pawn ah Covid 19 vang a thi Mizo 12 an awm a, chung zing a mi 8 te chu Mizoram pawn a thi an ni. 

India ram state hrang hrang a Covid 19 vang a thi Mizo 8 (hmeichhia 6, mipa 2) te chu Gujarat, Kolkota, Delhi, Madhya Pradesh, Pune a awm an ni a, Kolkota ah mi 2 leh Madhya Pradesh ah Covid 19 vang a thi 3 an awm. An zing a mi 2 te chu Thlaraubo Zawngtute (TBZ) hnuai a thawk missionary an ni.

Covid 19 hripui leng thawh hnihna in India a nuai mek a, hemi vang hian New Delhi-a Mizo zingah Covid 19 vei, damdawi ina enkawlna chang lo, Mizo zingah an awm a nih chuan Vasant Vihar Mizoram House hall chu Intensive Care Unit anga hman theih tura lo cheibawl turin chief minister Zoramthanga chuan a hriattir tawh a ni.

April thla chhung vek khan Mizoram ah Covid 19 vang a thi mi 4 awmin, an vaiin Mizo vek an ni a, hmeichhia 1 leh mipa 3 an ni. Kumin chhungin January ah Covid 19 hripui vei hmuh chhuah mi 156 awmin, thi 1 a awm a, February ah mi 51 leh thi 1, March ah 53 leh thi 1 an awm a, April ah 1,657 awmin thi 4 an awm. Mizoram ah kumin January - April chhunga Covid vang a thi chu mi 7 an tling tawh.

Tarlan tawh angin, Mizoram a Covid 19 vei hmasa ber chu March 24, 2020 khan Guwahati Medical College ah hmuh chhuah a ni a, chumi hnua hmuh chhuah leh hmasak ber chu June 1, 2020 ah niin, ZMC laboratory ah hmuh chhuah a ni.