Aizawl March 31, 2024 : March thla chhunga Kawnpui thleng rel kaltir tum chu harsatna neuh neuh a awm avangin a hun takah peih hman a ni lo a. April, 2024-ah erawh Kawnpui hi luhtir hman ngei tum a ni.

ZALEN-in Railway Consultant Hrangtawna a biaknaah a hmaa March thla chhunga Kawnpui leh Hortoki thleng rel kaltir tum chu harsatna neuh neuh avangin tihhlawhtlin theih a ni lo a. Kawnpui leh Hortoki station-ah hian rel phah (track linking) zawh a ni tawh a, April-ah chuan a luh ngei beisei a ni tih a sawi a. Ruahman dan chuan August, 2024-ah Mualkhangah rel luhtir hman tum a ni tih a sawi bawk.

Kilomenter 51.38-a thui Bairabi to Sairang kawng siam nan hian a tirah vaibelchhe 2,393.49 ruahman a niin a hnuaah vbc 5,021.45-ah revise a ni a, a zawhna atan hian vbc. 6,527 vel ngai tura chhut a ni.

Bairabi to Sairang inkar rel kawng thui zawng hi km 51.38 niin lei dawh lian (major bridge) 55 leh lei dawh tenau (minor bridge) 87 a awm a. Hmun 32 laiah leiverh (tunnel) a awm a, leiverh zawng zawng thui/sei belhkhawm pawh hi km 12.63 a ni dawn a. Leiverh tunnel thui ber sei/thui zawng chu km 1.88 a thui a ni.

He project atan railways-in ram hectare 481.18-a zau an hmang mek a. Kolasib district huam chhungah forest ram hectare 38.94-a zau leh non-forest land mi mal ram hectare 308.01-a zau leh Aizawl district huam chhungah forest ram hectare 35.547-a zau leh non forest land mi mal ram hectare 98.595 zau an hmang a. Heng zawng zawngah hian zangnadawmna compensation vaibelchhe 840 bawr vel ram neitute pek an nih tawh nia thudawn a ni.